ZALEN November 11, 2024 : Central YMA President Lalhmachhuana hovin vawiin khan Central YMA hruaituten Home Minister an hmu a, Relief Camp thar sakna tur DM&R Deptt. a senso an dilna lehkha an thehlut a, tunhnaia zirlai pawl pakhat hruaitu man a nih chungchanga an ngaihdan te an hrilh.

Tunhnaia Sub-Hqrs. YMA, Champhai huam chhunga Myanmar Unau Raltlante khawsakna In (House) chu, Sawrkar lamin an hman a tul dawn tak avangin, Relief Camp thar sakna tur DM&R Deptt. a senso tur sum an dilna lehkha DM&R Minister hnenah an thehlut a, Minister chuan tul leh tha a tih thu leh; a rang thei ang bera hmalak dan tur Committee koh a nih tur thu a lo hrilh.

Central YMA-in Village Profile Apps. Lailen Consulting Pvt. Ltd. an siam tir chungchang an sawi hova, Home Minister hian senso ngai belh tur a awm a nih pawhin, a rang thei ang bera hman theih a peih ni se a lo ti.

Myanmar buai avanga Zohnahthlak raltlan, mi engemaw zat, Manipur Jail-a hren mekte chu Mizoram lama lak chhawn theih dan kawng dap tura Central YMA ngenna chu, Police lam hotute nen hmalak dan tur an lo sawiho tur thuin a lo chhang.

Central YMA hruaitute hian Home Minister hnenah; tunhnaia Zirlai Pawl pakhat hruaitu man an awm chungchangah dan chunga leng tumah kan awm lova, amaherawh, chu he thil thleng avanga Mizoram Zirlai pawl leh hruaitute inkarahte, Sawrkar lam nen a inkarahte pawh boruak thalo awmlo tura ram leh hnam ngaihtuahna fim tak nen a kalpui a tul an tih thute an sawi.