ZALEN January 11, 2026: Central YMA President R. Lalngheta kaihhruai Central YMA Road Monitoring Committee chuan Inrinni khan Kawnpui-Serkhan-Durtlang kawng (KSD Road), BRTF hnuaia contractor, BRN Infrastructures Private Limited-in an thawh mek chu a tum hnihna atan an endik a. An hnathawh mek chu Central YMA Road Monitoring Committee ten an duh khawp loh lai leh, hna chak zawka an thawh dan tur te an sawipui a. Contractor te pawhin tha zawk leh chak zawka thawh an tum thu an lo hrilh a ni.

Kawng siamna hmunah hian CYMA Team te hian, Alkatra (bitumen) mix sat zâwng (temperature) pawh an endik nghal a. Endikna atangin temperature chu degree centigrade 142 lai a sa a tlin avangin lâwmawm an ti a. Amaherawhchu, thlasik khaw vâwt hnuaia kawng chhuata an chap darh chhûngin, temperature hi a tlâk hniam chak êm avângin, a theih chin chinah chak zâwk leh rang zawka khâwl hmanga a chap darh hna hi thawk tûrin, BRTF leh Contractor te hi an hrilh zui nghal a ni.

CYMA Road Monitoring Committee hian Sairang to Vairengte Kawng siam mêk pawh an endik nghal a. Helai kawng hi NHIDCL hnuaia company hrang hrangte thawh a ni a. Company-te hian an harsatna te lo thlenin, CYMA hruaitute hian a theih dan ang angin hma an lakpui zui nghal a. Sawrkar thuneitute pawh biaksak nghalin, Company lam pawh an lawm hle a, phur tak chung leh chak zawka hmalak an tum thu an sawi ve bawk a ni.

Kawng siamtu Contractor hrang hrangte hi, CYMA hruaitute chuan furpui lo thlen hma ngeia an hnate thawk zo ngei tûrin an hrilh a. 

December 16, 2025 (Thawhlehni)-a kawng siam hna an endikna leh, chak zâwka hna thawk tûra CYMA ngenna chuan awmzia a nei hle tih an hmu a. Hnathawhna hmanrua leh khawlte pawh an chhawp kim viau tawh tih an hmuhin, lawmawm an ti a. Contractor la inpeih fel chiah lote pawhin, January 13, 2026 aṭang chuan an khawl bun thar te pawh an hman theih tawh tûr thu sawiin, a chak thei ang bera hna an thawh nghâl tûr thu, CYMA Team te hi an hrilh bawk a ni.

Kawng endiknaah hian CYMA Road Monitoring Committee Chairman R. Lalngheta (CYMA President), Er. H. Duhkima, CYMA Treasurer leh Members (CEC) 7 te, BRTF Official-te leh Contractor te, NHIDCL General Manager leh Pakage tina Contractor-te kim takin an tel a ni.