Aizawl; Nimin a Central YMA thuneitu sang CEC thukhawm chuan Dr. BD Chakma chu Minister atanga ban tura Chief Minister ngen leh nise an tih bakah a hma thei ang berin Chakma Census neih nise an ti. Nimin CEC meeting chuan Dr. B.D. Chakma chu Minister tih loh tur MDC By-Election Boycot tuma a tel ve a vanga Chief Minister hnena Minister anihna atanga ban tura an lo ngen tawh hnuah, July ni 26&27,2014-a Silchar-a Chakma Convention-ah Mizoram satthla tura an relna ah a tel lui leh tih sawichhuakin hei hi Central YMA chuan a ngaithiam lo hle tih an sawi a, Chief Minister hnenah Minister atanga ban a nih theih nan na zawka nawr leh nise an ti. Hei bakah hian CEC chuan Chakma Census neih tha an ti a, Chakma Census hi Chakma Autonomous District Council huamchhung ah chauh ni lovin, Mizoram pumah neih nise, hemi senso atan hian YMA Member tinah Rs. 5/- theuh khawn nise, September, 2014 chhunga Central YMA Office-a thehluh hman nise, an ti bawk. CEC meeting chuan P&E Department ten Electric Bill an tih san chhan leh Power Tariff chhut nana Deptt. in loan an lak zat, a pung leh an la bat zat bakah thawktu zat Sorkar (Finance Department)-a an zawh nawnna an chhan dan chu an duh khawp loh avangin, RTI Dan hmanga zawh nawn leh nise, an ti a. Ni 30th Sept-2nd Oct., 2014 chhunga YMA General Conference 2014 Ratu-a neih turah khuallian atan Pu Lal Thanzara, Hon’ble Minister, Health & Family Welfare etc. chu sawm nise an ti bawk. Zalen zawhna chhangin Central YMA President Lalbiakzuala chuan Minister Dr. BD Chakma ban tir chungchangah hian remchang hmasa berah Chief Minister hmuh a, sawipui an tum tih a sawi a. Chakma census pawh study group insiamin an nin ruahmanna siamin a hma thei ang bera hna tan an tum tih a sawi bawk. Study group ah hian CYMA General Secretary ni mek Vanlalruata chu chairman a ni a, Lalhmingmawia CEC chu Secretary niin member 6 an awm bawk.