Aizawl August 31, 2024 : Gilead Special School zirlaiin inrinni hian Kulikawn Ngaizelah multi brand showroom a hawng a, an dawr thar hawn a nih rualin D3 Business Enterprise chuan rualbanlo school naupang harsatte a tanpui.

ITI Veng naupang, kum kaw mi Lalrinthazuala (Tea) chuan ribbon chep chatin mipuiin dawrah an zui lut a. Kum 14-na hmang mek LG leh Haier distributor D3 Business-in Aizawlah home appliances showroom pali a hawnna a ni.

Proprietor Dr Lalmalsawma Nghaka chuan vohbik naupang Tea chu D3 Business ngaisangtu leh dawr lem pawh ziak hial ṭhin a ni a, chuvangin chanvo pawimawh tak an pe a, a hmain mumal takin showroom an hawng ngai lo tih a sawi.

D3 Business-in a tih fo tawh ṭhin chhunzawmin Gilead Special School, Bawngkawn Brigade leh Shining Star Special School, Republic Venga rualbanlo zirlai harsa zual puih nan sum hlawm a hlan nghal ve ve

Dr Mala chuan, "Mizoram hmun hrang hrangah ka zin hnem ve viau tawh a, zirna mamawh rualbanlo naupang eng emaw zat an awm a, anni ang zirna pek hi mi pangngai aiin a buaithlakin senso a hautak a, vei an ngai hle a ni," a ti.

Zirlai 135 awmna Gilead leh naupang 32 enkawl mek Shining Star hotute chuan 'zirna mumal dawng lo vohbik naupang an ṭhahnem' tih an sawi a, sorkar mai bakah kohhran leh tlawmngai pawlten zirna in din lamah ṭan la se an duh hle a ni.

Mizorama hriat hlawh tak D3 Business-in 2010 khan Ramhlun North-ah LG showroom hawngin bul a ṭan a. Sumdawnna hmun lûn tak ni zuiin Ramhlun North-ah tho Haier showroom a hawn belh bakah, Chanmari-ah home appliances showroom dang a hawng tawh bawk.

Huang zauh zelin Kulikawnah internet lama sumdawnna kalpuiin Melthumah ran chaw ṭha Rongli dawr a hawng a, Amrit Cement distributor a ni mek bawk a ni.