'King of Reggaeton' ti hiala an sawi thin Puerto Rican singer Daddy Yankee chuan kum 30 chuang zet a lo chenchilh tawh rimawi khawvel chu a chawlhsan dawn hnai tih a puang tlat mai le. 

Daddy Yankee hian tun hnai khan hemi chungchang hi a sawi chhuak a, tour a neih zawh rualin rimawi a chawlhsan tawh tur thu a puang. Tunah hian farewell concert tour a nei mek a, December 2, 2022-ah a zo fel dawn - hemi hnu hi chuan kum 32 zet a lo chenchilh tawh rimawi khawvel chu a mangtha ve tawh dawn a ni. 

Kum 45 mi Daddy Yankee hian March 24, Zirtawpni khan a album hnuhnung ber tur 'Legendaddy' a tichhuak a, hla 19 a awm. Hengah hian zaithiam lar tak tak - Bad Bunny, Rauw Alejandro, Myke Towers, El Alfa, Lil Jon leh Pitbull te a thawhpui a ni.

Sulhnu ropui 
Daddy Yankee hian sulhnu ropui tak a hnutchhiah a, 'King of Reggaeton' ti hiala sawi a ni. A hnampui Luis Fonsi nena an sak 'Despacito' chu khawvela hla lar berte zingah chhiartel a ni reng tawh dawn a, an record ropui tak avangin ngaihsan an hlawh reng tawh bawk ang. He hla hian YouTube-ah entu mi tluklehdingawn sarih (7) chuang zet a nei tawha ni!

 'Gasolina' rapper hi a hming tak chu Ramon Luis Ayala Rodriguez a ni a, studio album pariat a tichhuak tawh. A hlate hi copy maktaduai 30 chuang a hralh tawh a,  kum 2004 a a tichhuah 'Gasolina' chu reggaeton song zinga Latin Grammy Award (Record of the Year) dawng thei tura chawpchhuah hmasak ber a ni. Rimawi lama chawimawina ngaihhlut hlawh tak tak - Latin Grammy, Billboard Music Award, Latin American Music Award leh MTV Video Music Award bakah, chawimawina dang thahnem tak a dawng tawh a ni.