ZALEN February 9, 2026: Mizoram Pradesh Congress Committee chuan vawiin February 9, 2026 Political Session an hmang a, he hunah hian AMC Corporator leh MPCC Secretary ni bawk Rosiamngheta chuan, “Hnam anga kan invenna tur leh kan dam khawchhuahna tur kan ngaihtuah a ngai tawh hle," a ti.

AMC Corporator chuan, "Tunah hian sakhaw zalenna hnuaia kan awm avang hian secularism hi kan ngaihlu lo a ni maithei. Secularism hi India ram dan puia a awm theih nan India rama church father ten hun rei tak chhung an nawr ngar ngar a, 42 Amendmnet ah Congress-in constitution-ah a thun ta a. Tunah hian secularism hi a nghing tan a, India ram constitution atanga paih tumin BJP ten hma an la mek a ni," a ti.

"Tirhkoh Thoma kha AD 52 ah India a rawn thleng a, a martar nghe nghe a. India hi India tia hming vuah a nih hmain Kristianna a rawn lut tawh a ni. BJP te hian India hi an inti neitu em em a, Hindu leh Sindhu tih tawngkam hi Persia tawng a ni a, an tobul Mohenjodaro hi Pakistan-a awm a ni bawk. BJP te hian keini kristiante hi foreign sakhua min ti tawh suh se. Hindu pawh foreign sakhua tho a ni.

Congress hi kan tha ber kan ti lo; mahse, kan innghahchhan hi kristianna a ni a, a tir atangin kristian ten India thatna turin hna an thawk ngar ngar zawk a ni," a ti bawk.

MPCC Secretary chuan, "BJP te hi kan tlan khalh a ngai ta hle. Hmasawnna kan duh avangin kan kristianna kan kalsan ang tih a hlauhawm. Hmanni lawkah FCAA kan pass a, kan CM-in a fak dur dur kha a mak hle, Direct-a rawn luhtir an duh hi a thil mak tak a ni. Direct-a an rawn luh hma pawhin railway pawh kan lo sual chhuak tawh tih te hi hre rawh se. Direct-a rawn luh tir an duh chhan hi CM kan zawt a ni."

"Kan ram hi BJP Hindutva hnuaiah development hmangin min run mek a, Muslim hovin thil dang hmangin min run ve bawk. Politics kan khelh chhan chu he hnam hi dinchhuah tir kan tum vang a ni a, kan harh a hun tak zet zet tawh a ni." a ti bawk.