Aizawl: January atanga September 5, 2016 thleng khan mi 49 te chu damdawi hman dik loh avangin an boral a, kumin hi kum 12 kalta chhunga dam dawi vanga thihna tam ber kum a ni. Excise & narcotic department atanga thu dawn danin kumin damdawi hmansual vanga thi te hi mipa 41 leh hmeichhia 8 an ni a. Nikum 2015 khan damdawi hman khawloh avangin mi 27 an boral a, heng zingah hian hmeichhia 3 an tel a. Hetih lai hian kumin thlariat chhung hi mi 49 te chuan damdawi hman khawloh avangin an nunna hlu tak an chan tawh a, kumin hi kum 2005 atanga damdawi hmansual vanga thihna a san ber tum a ni. Damdawi hmansual vanga thihna ah hian heroin chu a sang ber niin mi 27 te chuan kumin chhung hian an nunna an chan phah tawh nia thu dawn a ni.