Aizawl: Excise & Narcotics Department ten kumin January atanga December 14, 2017 thlenga an chhinchhiah danin Mizoramah damdawi hman sual vanga thi 60 an awm tawh. Chhinchhiahna atanga a lan danin damdawi hmansual vanga thi zinga 49 hi mipa an ni a, a dang 11 hi hmeichhia an ni. Damdawi hmang sualtute thihpui tam ber hi heroin a ni a, heroin hman sual vanga thi hi 28 niin a dang 32 hi heroin leh thil dang hmanpawlh te an ni. Excise & Narcotics chhinchhiah danin kum 1984 atang khan damdawi hman sual vang hian Mizoram ah thi 1462 an awm tawh a, heng zinga 1300 hi mipa an ni a, hmeichhia 162 an awm bawk. Chhinchhiah danin damdawi ti thinte thihpui tam ber chu proxyvon/parvonspas a ni a, he damdawi vang hian mi 1167 an thi tawh a, heroin chuan dawtin 173 an thi a, a dang 122 hi damdawi hrang hrang tihpawlh te an ni. Excise & Narcotics Department chhinchhiah danin kumin kumtir atanga October thla tawp thleng khan heroin kg 5.2, ganja kg 379.943 leh meth mum 13400 an man tawh a. ND&PS Act hnuaiah mi 429 leh MLPC Act hnuaiah mi 925 manin Mizoram Excise Act hnuaiah mi 225 an man tawh bawk.