Aizawl: Natna chi 5 vengtu dahkhawmna ‘Pentavalent Vaccine’ leh zeng hri umbona ‘IPV Vaccine’ chu kumin chhung hian Mizoram ah kalpui tan tum a ni. Pentavalent vaccine-ah hian natna chi 5 diphtheria (hrawk nahawk harsa), tetanus (sakawrehrik), pertusis (khuhhip),pneumonia, septicemia, khawsikpui leh hepatitis ‘B’ te chu hmun 1-ah dah khawmin naupang hnenah pek a ni tawh dawn a, vaccine hi October ni 15,2015 atangin Mizoramah kalpui tan tum a ni. Zenghri venna/ umbona tur Inactivated Poliovirus Vaccine (IPV) pawh kumin November/ December ah chuan Mizoram ah kalpui tan tum a ni. Hetih lai hian zeng umbona atana damdawi hman mek, naupang kaa zeng damdawi thlawr (OPV) chu hun eng emaw chen kalpui hrih a la ni ang a, nakum April 16 ah aei chi dangin thlak tum a ni a, kum 2019-20 ah chuan zeng vennan hian a chiu chi chauh hman tum a ni tawh. October ni 15,2015 atanga Mizoram a kalpui tan tum Pentavalent vaccine hi mithiam ten tha tawka an ngaih a ni a, India ram state 16 ah kalpui tan a ni tawhin hmarchhak bialah chuan Assam kumin kumtir atang khan bultan a ni tawh a ni. Pentavalent vaccine thatna langsar zingah chuan a hmaa a hran veka vaccine lak/chiu ngai thin kha hmun khatah chhunkhawm anih tak avangin naupang tum 9 jection ngaihna thinah tum 3 chauh a ngai tawh dawn a. Tin, Health department thawktute tan pawh bur hrang hranga vaccine kenkual ngai thin kha hmun khatah dahkhawm anih dawn tak avangin kenkual leh buapui a awlsam phah sawt dawn a ni. Mithiamte chuan zeng natna hi chi 3- P1, P2 leh P3 ah te an then a, tuna naupang kum 5 hnuailam hnena zeng danna pek thin ah hi chuan zeng natna hrik tihchauh tawh pek thin a ni a. IPV ah hi chuan zeng natna tih thih tawh pek a ni dawn thung. Zeng natna zinga mi P1, P2 leh P3 te hi India ramah atangin umbo a ni tawh a, mahse thenawm ramah hmuh a la ni thung. Pentavalent leh IPV vaccine chungchang hi September ni 29,2015 khan Indian Institute of Bank Management, Khanapara, Assam ah hmarchhak state 7- Arunachal, Nagaland, Manipur, Mizoram, Meghalaya leh Sikkim te tan zirhona buatsaih a ni a. Mizoram atang pawhin Health department thawktu mi 8 leh Press mi 5 chu Dr. Vanlalrengpuia, Asst. State EPI Officer hovin an tel a ni.