Aizawl: Sawrkar laipui ruahmanna siam angin Health Department chuan damlo harsa zualte tan scheme thar 3 a ruahman a, hengte hi a maawhtute tan ngaihven theih a ni. Genereric Drugs Store a hawnnaah he thu hi sawiin Health Minister Lal Thanzara chuan Health Ministers Cancer Patient Fund hnuaiah Cancer damlo (BPL) tan Rs. nuai 2 hu thleng enkawlna dawn theih a ni tiin a mamawhte tan Mizoram State Cancer Institute, Zemabawkah ngaih-ven theih a ni, a ti a. Hei bakah hian Health Ministers Discretionary Grant hnuaiah chhungkaw sum lakluh kum khata Rs. nuai 1 chin hnuai lam tan dil theih a ni a, natna serious dan a zirin Rs. nuai 1 thleng hmuh theih a ni a. RAN (Rastriya Arogya Nidhi) hnuaiah BPL damlo te tan bik Rs. nuai 2 thleng natna serious dan a zirin hmuh theih a ni tih a sawi bawk. Aizawl Civil Hospital-a sawrkar hmalak mekna te tarlangin Health Minister chuan Operation Theatre (OT), damlo inthiarna leh ward te a tha thei ang bera chei mek a nih vangin Surgery leh Ortho OT te khar hrih an ni a, Ortho OT hi Zirtawpni atang khan emergency bikte an zai thei tawh tih a sawi a. Semi Cabin cum Geriatric ward building leh Dental ward & OPD, Microbiology tan khawl thar, natna hrik leh septicemia hriat zung zung theihna tur nuai 30 man lei tih a sawi bawk.