Andy Murray leh Novak Djokovic chu a tum 37-na turin Madrid Open last 16-ah an inhmachhawn thei dawn a, anni pahnih hi kum 5 hnuaa an intawh lehna tur chiah a ni bawk. Mahse Dominic Thiem leh Denis Shapovalov hneha third round lut Murray chuan dam lohna vangin Novak Djokovic a hmachhawn thei dawn lo.

Tournament buatsaihtute chuan Twitter lamah,"Vanduaithlak takin Andy Murray chu damlohna vangin Manolo Santana Stadium-ah a inlan thei dawn lo," tiin an tarlang a, Madrid Open-ah hian Murray hi wildcard hmanga khel a ni. Quarter-final-ah Rublev chuan Grigor Dimitrov emaw Stefanos Tsitsipas a hmachhawn dawn a, Murray a inhnudawh takah chuan Djokovic hian Poland mi Hubert Hurkacz a hmachhawn thung ang.

Madrid Open-ah hian Rafael Nadal chuan round of 16 a lut ve tawh bawk a, a champion thei a nih chuan Master title la hnem ber Djokovic-a record a khum thei dawn a ni. Nak ruh na vanga March thla atanga chawl tawh Rafael Nadal chuan third round lut turin Miomir Kecmanovic chu 6-1 7-6 in a hneh a ni. Spaniard hian May ni 22-a khelh tan tur  Roland-Garros Grand Slam tana inpuahchah mek a nih thu sawiin, a record dinglai khuma French Open title tum 14-na tur lak ngei a tum ruh hle a ni.