Aizawl: Aizawl Civil Hospital thawktute chuan sawrkar laipuiin damlo harsate tana scheme a duan hrang hrangte chu mipuiin chhawr tangkai lehzual se an duh tih an sawi. Mipui ten an chhawr tangkai tur scheme hrang hrang te hi Health Minister Cancer Patient Fund (HMCPF), Rastriya Arogya Nidhi (RAN), Health Minister Discreationary Grants (HMDG) leh Dr. Ambedkar Medical Aid Scheme te an ni a. HMCPF, RAN leh HMDG te hi Ministry of Health & Family Welfare hnuaia mi a niin Dr. Ambedkar Medical Aid Scheme hi Ministry of Social Justice & Empowerment hnuaia mi a ni a, heng scheme hrang hrang hnuaiah te hian sum pekchhuah kawngah harsatna a awm lo nia thudawn a ni. Zalen palaiin a kawmna ah Aizawl Civil Hospital Medical Superintendent Dr. Rosangluaia chuan, "Scheme tha taka tak awm te hi mipui te hian ngaihvenin chhawr tangkai thei se kan duh ber a, tunah hian bul kan tan chauh a, a tak taka hna kan thawh hunah chuan Mizoram Health Care sum pawh tam tak kan chhawk theih kan beisei a ni," a ti.