ZALEN September 22, 2025 : Vawiin khan BJP Mizoram State Office, Mipui Rûn, Upper Republic-ah Karthar Inhlanna neih niin, Dampa bial By-Election lo awm tur atana BJP Official Candidate puanna hun BJP Mizoram State President Dr. K. Beichhua, MLA -in a nei.

Dr. K. Beichhua chuan thusawiin, "BJP Mizoram-in a Pu Lalhmingthanga, West Phaileng khua ngei Candidate atan kan nei thei hi a lawmawm a, Dampa Bial ah hian vawi 2 a dinna tur a nih avangin Dampa Bial siamṭhat a duhna hi hei hian a tichiang hle in ka hria a ni," a ti.

Beichhua chuan, "Dampa Bial hmasawnna turin BJP Mizoram chuan theihtawp kan chhuah dawn a, Dampa Bial mipuite mamawh leh tlakchhamna phuhru turin BJP chuan kan Candidate kaltlangin hma kan la dawn a, Health Sector lamah te, Zirna chungchangah te, kawng chhia chungchangah te, mipui mamawh thlensak ngei BJP chuan kan duh leh kan tum a ni," a ti.

Dampa Bial BJP Mizoram Official Candidate Lalhmingthanga chuan thu sawiin, "Khawvela Party lian berin a kei tehlul BJP aiawha ding tura min thlang hi ka lawm hle a, Party dang ah ka lo awm ve tawh a, BJP Office ka thlen hian a thlamuanthlak êm êm bik mai a, a mak ka tiin, a nuam ka ti hle a, National Party lian ber ah chuan kan zalen ru riau ta mai hi a lawmawm ka ti hle a ni," a ti.

Hmingthanga chuan, "Ka Politics kalkawng hi a bumboh ve hle mai a, Pawl 9 ka nihlai aṭang daih tawhin Dampa Bial MLA nih ka lo tum tawh a, kan bial ka enin ka vei takzet a ni. Nimahsela sum leh paiah te neih ka neih ve loh avangin kan bial te beisei ang pawh kan phak lo viau mai a, inthlahrun a na a, kan hruaitute duhthusam pawh kan phak loh chuan kan tling thei ta lo a ni."

"Vawiinah erawh Central-a sawrkar mek BJP ah Official Candidate tur ka nih takah chuan Dampa Bial mipuite hnena ka chah duh chu ka fel ber ka ti lova, amaherawhchu Dampa Bial kei aia hmangaihtu an awm ka ring lo, Dampa Bial mipui te'n min thlang tling a nih chuan Dampa bial tana MLA ṭha ber nih ka tum dawn a, kan Bial hmasawnna turin a theihna apiangah hma kan la ang a, Dampa bialah hmasawnna tak tak thlentir hi ka tum ber a ni. Chuvangin Dampa Bial mipuite khawngaih taka kan Bial hmasawnna tur atan thawhhona ṭha tak kan neih theih ngeina turin tun By-election lo awm tur hi Bial tana inlungrualna hun leh Party Politics dah ṭhaa kan veng leh khua tana ngaihtuahna dik siam ṭheuh turin ka sawm vek che u a ni," a ti bawk.

BJP Dampa By-election Official Candidate Lalhmingthanga hi Kum 1975, February ni 4 khan West phaileng ah a piang a, A nupui Lalchhanhimi nen fa pathum an nei a ni. Thiamna lamah MA B.ed niin, West Phaileng Secondary School Headmaster te, Gospel Centenary High School West Phaileng Dinthar-ah te Zirtirtu hna a lo thawk tawh a, Kohhran rawngbawlna lamah West Phaileng Chhim Veng Presbyterian Kohhranah thuhriltu niin, Puitling Sunday School zirtirtu, Finance Committee ah Asst Secretary a ni bawk a ni.