ZALEN August 29, 2025 : Bye-election neihna tur Dampa bial a tlawhnaah vawiin khan West Phaileng-ah BJP Mizoram State President chuan mithar lawmluhna a nei a, Dr. K. Beichhua chuan, "Mizoram politics-a hmalam hun êng ber neitu chu BJP a ni a, Congress leh MNF-te hun a liam hrih a, ZPM kan enchhin mekah mipui an beidawng mek a, chuvangin BJP hmalam hun a êng ber a ni," a ti.

BJP President Dr. K. Beichhua chuan politics-ah thutlukna siamfuh a pawimawh thu sawiin, "Keimahni chauh kan inhungbik a, thliarkar rilru kan put chhungin kan ṭhenawm state te'n min lehpel vek dawn a ni, kan state aia hnufual ṭhin Arunachal Pradesh-te pawh tunah chuan Union Cabinet Minister neiin, Prime Minister Modi bula ṭhu pha a ni tawh a, an State-in an vanneihpui hle a, Zofate hian politics ah thutlukna dik kan siam chuan hetiang dinhmunah kan ding ve thei a ni," a ti.

Chhimlam bialin BJP MLA pahnih an thlan tlin avangin hmasawnna project ṭhahnem tak Central sawrkar-in a pe mek tih sawiin Dr. Beichhua chuan, "Siaha district leh Delhi kan thlunzawm mek a, politics-ah chhimlam bialin BJP an thlan tlin avanga Central sawrkar kaltlanga malsawmna an dawn mek chu a temtu ni ve tur leh, Dampa bial leh Delhi thlunzawm ve turin bial mipuite chu ka sawm nghal bawk che u a ni," a ti.