ZALEN November 17, 2025: Vawiin chhun khan Vanapa Hall-ah, Dampa bial by-election-a MNF-in hnehna a chan avanga Pathian hnena lawmthu sawi inkhawm neih a ni a. He hunah hian MNF President Zoramthanga chuan Dampa biala ZPM candidate chaklohna hi ZPM party chaklohna leh Chief Minister chaklohna a ni, a ti.

MNF President Zoramthanga lo ni tawh chuan thu sawiin, "MNF-in kan duhtawk ni lovin, Pathianin a duhtawk min pe thin. Chuvangin, Pathian hnenah lawmthu kan sawi a ni. Dampa bial by-election a party zawng zawng campaign-a chhuakte accident laka veng tura kan tawngtaina chu Pathianin min chhang a. A lawmawm takzet a ni," a ti.

Chief Minister hlui chuan, "Dampa biala ZPM candidate chaklohna hi ZPM party chaklohna leh Chief Minister chaklohna a ni a. Bana kaih policy hnawlna a ni. Hei hi Pu Rama sawi nilovin, Pu Duha sawi a ni. Article 371 (G) hrechiang ber anga inchhal hian, a pawilai ber kan ram himna leh neitu kan nihna a hralh a, hriat ringawt a lo tawk lo a. A thlaraua chian a ngai a ni. Chuvangin, Ephraim ngawpui indonaa Absaloma a tlawm ang khan, Pathian duhloh zawng titute nen kan indo a tul dawn a. Thlamuang leh chhel takin i awm ang u. "Pathian leh kan ram tan," kan tih hi Pathianin mal a sawm ang."

"Lalrintluanga Sailo, hun lo taka a boral avanga inthlan a ngai ta a. A nupui fanaute leh chhungkua zawng zawngin theihtawp an chhuah a. Party mite, headquarters leh bial mite leh mimal thahnemngai zawng zawngte chungah lawmthu ka sawi a ni," a ti bawk.