ZALEN October 29, 2025: Congress chuan FCAA chungchangah MNF leh ZPM te hi inbei tur bik an awm lo, mawhphurtu an ni ve ve a, MNF chu Dampa bye-election vote zawnna avanga total bandh neiah MPCC chuan an ngaih thu thuchhuah an siamah an tarlang a ni.

MPCC chuan Parliament a Forest (Conservation) Amendment Act (FCAA), 2023 siamtu BJP leh a thawhpui National Democratic Alliance (NDA) sawrkar an dem a. He dan tha lo tak pawmpuina resolution Mizoram Assembly House-ah ZPM sawrkar in a lo pass hi Mizoram tana pawi tak a nih avangin tha an ti lo.

Congress chuan, "July 23, 2023 ah FCA Bill Parliament a sawiho a nih khan Congress MP ten nasa takin an dodal a. He bill hi Congress MP ten nasa taka an dodalna karah Parliament a passed a ni a. Khami bill passed a nih nî khan MNF MP (LS) pawh Parliament-ah BJP te lamah a thu ngei a ni. MNF hian he FCAA hi an dodal tak tak a nih chuan he dan siamtu BJP an thawhpuina NDA hi chhuahsan se la, BJP nen an thawhdunna hi chhuchat ngam rawh se," an ti.

MPCC President Lal Thanzara chuan October 15, 2025 khan AICC hotute Delhi ah hmuin FCAA chungchang a sawi pui a. Mizoram map te en hovin international boundary atanga 100 kms huam Myanmar leh Bangladesh karcheh chhung a nih deuh vek dan te a sawi a. AICC Gen. Secy KC Venugopal chuan Congress in thuneihna an chan veleh he FCAA hi an ennawn nghal ang a lo ti a ni. 

MPCC chuan, "Kum 2019 MP inthlan dawnah Citizenship Amendment Bill (CAB) kan do ang tiin MNF an intiam nasa a. Mahse thlantlin an nih hnuah Lok Sabha-ah a bill support tu an ni leh si a. CAB an support chhan NE States a huam ve lo nia an sawi ang khan, FCAA in NE states huamtir ve lo tura an thawhpui NDA sawrkar an nawr thlu thei a nih loh chuan, FCAA dan passed tu te zingah MNF MP an tel avangin he dan hi do ve thei an ni lo tih leh Dampa bye-election vote zawnna avanga total bandh neiah MNF te hi kan ngai a ni," an ti.

Chief Minister in YMA khawmpuilian Sakawrdaia neihah FCAA huam chin tur international boundary atanga km 10 nia a sawi hi thudiklo a ni a. CM hian thupha a chawi lo a nih chuan thudiklo hmanga FCAA hlauhawmlo anga mipui zirtir tumna niah MPCC chuan a ngai.

Dampa bial hi Bangladesh hnaihte an nih avangin FCAA tuar ber tur an ni a. Chuvangin he dan thalo tak passed tu zinga tel BJP leh an thawhpui MNF te, Mizoram Assembly a resolution passed a lo pawm tu ZPM te hi Dampa bial mipui ten lo hnawl turin an ngen bawk a ni.