Mizo film chhuak thar tur Dampui Forest chu July 27, 2023 ah tlangzarh a ni dawn a, official tailer pawh tihchhuah a ni ta. Shooting an zo fel tawh a, editing lam an khawih mek. 

Zirtawpni zan khan official trailer tihchhuah a ni a, Zira Pc #198 #naturelovers YouTube channel-ah upload a ni. Trailer atanga a lan danah phut deuh zawk zawkna tur a awm dawn tih a chiang a, Mizo ten kan neih tam loh adventure horror hmuhnawm tak chhawpchhuahin a awm dawn. 

Adventure lama tui mite tan chuan hmaih phal chi a ni dawn lo a, horror lam ngainatute tan pawh en ngei chi a ni ang - en laiin rilru pek lutuk avangin phut zawk zawng chang erawh a awm dawn tih a chiang e! 

Dampui Forest hi adventure lama hmun hma nei tha tak Ngentiang khuaah shoot a ni a, an zo fel tawh. Ngentiang khua leh a chheh velah hian film pumpui deuh thaw an shoot a, 90% zet a tling hial niin film director chuan a sawi. 
Ngentiang khua hi Serchhip District-a awm niin, Mizorama puk thuk ber Tuilutpui (feet 2225) awmna a nih bakah, kham ropui leh dangdai Khuaikham awmna a ni bawk. 

Khuaikham hi adventure lama hnuhma nei tha tak Zira PC chuan Vantawngkhawh thla aiin a sang hial niin a sawi a, official-a pawm erawh a ni rih lo thung. Chutih rual chuan a hmunah ngei kala teh thlaptu a ni a, a thusawi hi mi tam tak chuan an bengkhawn hle. 

Adventure
Mizo ten adventure film en tur kan nei meuh lo a, he lama tui mite chuan Dampui Forest hi an bengkhawn khawp ang le. Dampui Forest hi film danglam tak niin, Mizo film-a kan hmuh zen zen loh Adventure horror a ni. Sports Department-in adventure sport tih theihna hmun tur leh nature tourism tih hmasawnna lam hawi hmun (place) zawng tura adventure team a tirh chhuah ten harsatna an tawh dan tarlanna film a ni.

A changtute lam hi...
A changtute aṭang hian a hmuhnawm loh ring suh! He film-ah hian Mizo tlangval chhuanawm leh huaisen adventure leh bushcraft lama min hrat khaw kheng Zira PC a inlan a, hei chauh pawh hi en tichakawmtu a ni. Ani hian YouTube lamah follower a ngah a, a chet velna hrang ngaihlutu an thahnem hle. 

Zira PC bakah hian comedian ṭha chungchuang parody music video nalh tak tak leh en hlawh tak siam thin ELZA TV kan hmu dawn a, ani hian tun hnaiah phei chuan YouTube lamah boruak a nei lian hle. Fiamthu thiam Pachuau Lalenkawla a la awm cheu bawk - hmaih phal chi a ni dawn lo.

Anni bakah hian Zonet buaisaih Mizo Girls Group finalist Lalnunhlui a inlan dawn a, hmeichhe solo camper, Love of adventure youtube channel neitu ni bawk Apuii Bualte a inlan bawk ang. Main role play tur Emily pawh hi MZI zaipawl lamah leh College kal laia College Miss te pawh lo ni tawh a ni - Kenny Lianhna kan hmu dawn bawk. 

Director kam chhuak
Dampui Forest hi 'Detective Mart' film director Lalruatfela (Mart Khiangte) kutchhuak a ni dawn a, Ṭhatea video production chu Director of Photography a ni. 

Mart chuan Sports Department ten adventure sport leh nature tourism tih hmasawnna lam hawi hmun zawng tura adventure team a tirhna film a ni a, chung adventure team bakah chuan an va kalna Ngentiang khua aṭangin hruaitu pahnih nei bawkin buaina an tawh dan tihlanna film a nih thu a sawi. 

Mart Khiangte chuan, "He tiang film hi film awm zen zen lo a ni a, a hautakin fimkhur a ngai hle. Adventure horror bik tak phei hi chu Mizorama la awm ngai lo a ni hial ang, mipuiin an hlut ngei kan beisei," tiin a sawi. 

Dampui Forst hi July 27-ah Vanapa Hall-ah tlangzarh a ni dawn a, Runmawi Apps-ah en theihin a awm ang.