ZALEN Nov. 25. 2025 : EF&CC Department-in Lunglei Police Station hnenah Wildlife Dan bawhchhiatna an chhui chhuah avangin chawimawina an hlan.

October 2025-a Facebook-a Wildlife Dan bawhchhiatna video post chungchanga a titu chhui chhuahna kawngah Lunglei Police Station te'n rang taka hma an lak avangin Divisional Forest Officer (DFO) Thenzawl leh Working Plan Officer (South) te ṭang kawp chuan vawiin khan Lunglei P/S hnenah chawimawina thuziak leh pawisa fai an hlan.

He hun hi Lunglei Additional Superintendent of Police K. Beihmotaosa chuan a hmanpui a. Chawimawina hi WPO (South) Solai Azyu chuan Lunglei P/S Officer-in-Charge Inspector VL Sawma kutah hlanin, social media hman danah fimkhur tur leh ramngaw leh nungcha humhalhna dan te ṭha taka zawm turin mipuite a ngen nghal bawk.

He pawi khawihna thlenna hi Thenzawl Forest Division huam chhung a ni a. Wildlife Dan bawhchhetute chet dan video social media-a tar lan an hmuh aṭangin Environment, Forests & Climate Change (EF&CC) Department hotute chuan hma la nghalin, an ngenna angin Lunglei Police te chuan pawi khawihtute hi rang takin an chhui chhuak a. Pawi khawihtute hi dan anga hrem an ni.