Helhkam leh enghelh lian tak ka nei a. Chutih mek lain Ph.D bei mek Mizo tlangval fel tak pakhatin Chakma chanchin, an history min rawn zawt leh khauh pek a. Ka thil helhkam hi up beh ka tum a; mahse, Mizo hnam tan puan chhuah hi a tha zawkin ka ring a, ka han nikang mau puah leh pawng mai dawn a ni. Chawngkhum dan tlang huat loh kan ti a ni ang chu. Ka sawi tum hi a ruh lang rawtin ka sawi hmasa ang a, chumi hnuah thu nawi ka sawi belh ang.   Mizorama tlawmngai pawl lian ber, member 4,27,393 nei YMA chuan Ram leh Hnam humhalh tih kumpuan thupui bawhzuiin Mizoram pumah October 10 khan Dan lova din CADC thiah a nih theih nan kawng an zawh a. ‘Dan lova din’ tih lai tak an tanchhan hi tu sawi nge ni ta ang le? Mi pakhat thuziak hi YMA hotute hian chaw tak khuka kan lo khukpui chiam hi a dik ber ang em? Government of Mizoram hian CADC hi dan kalha din a ni lo, a ti a. Government of India hian Sixth schedule of the Constitution of India, Articles 244(2) and 275(1) dan hmangin a din a ni zawk si a.   CADC hi dan dik lova din anga kan puh a nih chuan Lai Autonomous District leh Mara Autonomoust District te pawh dan dik lova dina kan ngai tihna a ni dawn a. Government of India hian heng autonomous district pathumte hi Union Territory-ah hlang kai se, a tha hle zawk mai thei bawk. Engvang nge kan tih chuan Government of Mizoram hian heng Autonomous district pathum chhunga thingtlang khuate hi a enkawl (administer) tak tak thei lo. "   Bawnghnute-a tui chawhpawlh hi adulteration an ti a, danin a khap tlat. Thu dik hrula thudik ziktluak lo zeh tel hi manipulation an ti a, kawihsapir-a mahni duh lam lam hawia thu kuai kur hi a dik lo a ni. Chanchin thar phuahchawp hi a awm leh a, chu chu fabricated news an ti a, Donald Trump pawhin, “In hmuh leh in hriatte hi thudik ni lovin Fake news a ni e,” a ti bawk.   MLA & MP Inthlan apiang deuhthaw hian khawthlang lamah Presiding Officer-in ka duty thin a, Chakma khuaah ka duty thei khawp a, an chanchin pawh hi ka zir nasa hle a. Mizo zingah chuan Chakma history document nei kim ber ka ni mai thei e. Chakmaten serh hmul an neih leh neih loh thlengin scientific takin ka zir chhuak dap. Kum tin thlasik anga khel lovin HSLC & HSSLC Examination Sitting supervisor-in khawthlangah ka duty ziah bawk a. Mizoram chhim thlang tawp Parva I atangin Tuichawng lui dung zawng zawng suartluanin Synod Home Mission Board sikul te, Baptist skul te, RMSA leh SSA sikul te ka fang chhuak deuh vek tawh a. Chakma Autonomous district hi Mizoram a ni a, CADC-a Mizoten ram kan lei thei lo hi rilru a na a ni. Chakma hminga ram lei a ngai, biak in tur pawh. Chawngte@Kamalanagar daia BCM ram lei rukte ka en, Vaseikaia Synod Home Mission school compound te ka en. Nghalimluia BCM sikul a tha hle a, BCM hotute ka luhchilh a, sikul building sa tha vat tur leh ziritirtu pek belh turin thurawn ka pe a, ka thurawn an lo bawhzui a, sikul building tha tak an lo sa ta a, ka lawm em em a ni. Vaseikaia-ah Synod High School din vat turin Presbyterian kohhran hruaitute thurawn ka pe bawk. HSLC & HSSLC Exam laiin Chhim lam Presbyterian kohhran huaihawtin Vaseikaiah Gospel Week an rawn hmang a. A ring rek nazawng leh a ka kua tawh phawt chuan ka hnenah an rawn sawisel (complain) sup sup mai a. “Ka thuneihna a ni lo va, kum dangah exam laia event nei tawh lo tur chuan an kohhran hruaitute ka lo ngen ang,” ti hlirin ka chhang a. Ka thlen in pa, Vasei OC Pu K.Lalhluna te nen Gospel Week chu kan va chhim ve thin a, Constable Jonathana te, Ruata te, V.L. Sanga te ho kha security hna an thawk bawk a. Kei kha official ka nih avangin OC Khalthang Lalhluna khan Vaseikai muala Gospel Week an neihna dawhsan, stage-a ka thut lan ve kha a remti tlat lo. Venthawn a nei tlat! Chu chuan khu lai boruak hrisel lohzia (sensitive atmosphere) a lantir chiang e.   YMA thiltih ka sawisel a ni lo. YMA vek kan ni a, a chhiat a that hi kan mawhphurhna vek a ni a. “Dan dik lova din CADC” tih lai tak, kan tanfung hi a derdepin a derthawng tlat a, High Court leh Supreme Court-a dinpui turin thu a tling lo, tih Val upa thusawiin ka han sawi mai mai a ni.   Chakma chungchang mi rawn zawttu, Ph.D Intercultural studies & World Mission bei mek hi Spicer, Pune atangin Bachelor degree a zo va, Andrews University, Michigan atangin MA Religion (Major in New Testament Greek) a zir zo leh a, tunah hian Philipines-ah Ph.D a bei leh mek a ni. Ani hian Chakma chungchang lehkhabu lo ziaktu Dr. F.Lianchhinga ka hriat lehhriat loh min rawn zawt a. Ka mi hriat chian tak a nih thu leh Chhim bial chhantu pawl dintu a nih thu leh Pheichham mam Chakmate tih lehkhabu ziaktu a nih thu leh a borual tawh thu ka hrilh a. Dr. F.Lianchhinga (L) hi a ni, Chakmaten serh hmul an nei lo, Korean-ho ang khi an ni tih min hrilhtu chu. Mahse, a lo dik lo. Ph.D bei mek hnenah chuan ka lehkhabu ziak pahnih final editing ka ti mek a, khawdang hawi hman ka ni lo tih ka hrilh chung pawhin, “A nih leh research question siam ila, email-ah ka rawn thawn ang che a. Chu chu source atan a hman theih dawn a. Email screenshot thlapin tarlan a ngai dawn a, zawhna zualpui, an history, an hnam kalphung, an beliefs, an inneih dan, an hnam background history te hi tuna i hna i zawh hunah i chhang hman ang em?” a la rawn ti hram a, a ngenngawl ang reng si a, Mizo tlangval hetiang khawpa finthiamna lama dilchhut leh tuihal an awm hi ka lawm em em a ni. Ani ang vek hian history hi zir taima ila, humsual kan dai lo ang.   India ram zalenna a hmuh hlim khan North East tlangmite hi crown colony dil thei ang tein Bawrhsap McDonald leh Chhim lam Zosapte khan an sawi a, MNF movement a chhuah phah hial a. Kum 20 rambuaiah kan luh phah a, rambuai ve miah lo Arunachal Pradesh nen state-ah a rualin min hlang kai. Ho tak a ni kan independence sual ve kha! Khatiang policy, Crown Colony kha a tak takah a lo awm reng reng si lo a ni. Home Rule policy kha chu a lo awm ngei a; mahse, an tipuitling ta lo a nih kha!   Kum 1947 khan India ram chuan zalenna a lo hmu ta a, Bordoloi sub-committee rawtna zulzuiin kum 1952 khan Assam state sorkar hnuaiah The Lushai Hills Autonomous District Council pek kan ni a, Lai, Mara leh Chakma te an lungawi lo va, kum 1954 khan Pawi Lakher Regional Council din a ni a. A tir phat atangin a bilh a tho lo va, tawng chungchangah leh hotu nihna inchuhin an buai nghal a, hna thawk (function) thei dinhmunah a ding lo reng reng mai a. Chakma an lungawi lo va, thuneihna hran leh inrelbawl dan hrang an ngiat ve reng bawk a. Mizo tawng kha Pawi Lakher Regional Council-a official language a ni a, Mara leh Chakma ten an thiam ve si lo va. Kum1958 atang khan Mara ten Pawi Lakher Regional Council chu an boycott ta nge nge a. Chuvangin kum 1972 khan Six Schedule of the Indian Constitution dan tlawhchhanin Lai, Mara lehChakma Autonomous District a rawn piang ta a ni.   KA LUNGKHAM LEH KA HMATHLIR: Tuichawng kamah khuan Mizo khua tam tak zuk din ila, Lawngtlai- Akyab inkalpawhna Kaladan Multi-Modal Transit Transport Project tihpuitlin a lo nih chuan Tuichawng kama thlai thar zawng zawng hi aizawl leh Lunglei a rawn thleng thei vek tawh dawn a, Silchar leh Baghar thlai rin a ngai tawh lo ang. S.Bungtlang khaw hnuaiah KMMTT kawngpui hi a kal tlang a, S.Bungtlang leh Vasekai chu km 60 vel chiah a ni. Kawng tha se, darkar 2 tlan chiah a ni. Mizoram sorkara Vetty Department, Horticulture Department, Agriculture Department, AIR Lunglei, DDK Aizawl te hian eng ang mihring nge ka nih an hre chiang khawp mai. A nak zen chi ka ni a, DDK Aizawl hian vawi duai lo min rawn interview tawh. Mizoram sorkar hian CADC huam chhung Tuichawng lui kamah hian project siam se, Mizo khua din se, kum 10 chu ka volunteer thei zak!