ZALEN Oct. 21, 2024; Inrinni (19.10.24) zan khan Serchhip police ten Sailam kawnah dan lo a tuialhthei phurh nia hriat barel 56 an man a, an phurhna lirthei (207 truck) panga pawh an man bawk.

Lenkawl-a tarlan a nih danin, heng tuialhthei te hi Kabuganj filling station, Assam atanga phurh niin, Siaha lama pek tur a ni a. Diesel hi litre 2,400 leh petrol litre 8,800, a vaiin litre 11,200 a ni a, a neitu nia hriatte chu Laldinpuia (47), Vaitengte Zalen veng leh Lalremruati (45) Vairengte field veng nia insawite an ni.

Hetihlai hian facebook group pakhat, Serchhip News tih ah he thil thleng hi 'Zanin dar 6:30-7:00 bawr vela Serchhip petrol pump atanga an phurhchhuah diesel leh Sailiamkawn police duty ten an lo man' tiin post a ni a.

Serchhip petrol pump neitute chuan heng petrol leh diesel te hi an pekchhuah a nih loh thu sawiin, hemi chungchang chhui fiah tur hian nimin (20.10.24) khan Serchhip PS ah thubuai an thehlut a, Serchhip police te chuan hemi chungchang hi chhui zui nghalin, he thu post tu hi an hre tawh nia thudawn a ni.