ZALEN July 28, 2026 : Mizoram sawrkarin dan loa Family Pension la mekten anmahni duhthlannaa pension an tihtawp theihna turin Voluntary Surrender of Pension Payment Order a tihchhuah hnuah, Aizawl North leh Aizawl South Treasury-ah mi 12 in an surrender tawh.

Sawrkar chuan Family Pension latute tan mahni duh thu ngeia sawrkara pek kirna (surrender) hun July ni 1 atanga September ni 30 chhung a hawng a ni.

Aizawl South Treasury thawktuten ZALEN an hrilh danin, order chhuah atanga tun thleng hian dan loa Family Pension la mek mi 10 in an pension an surrender tawh.

Aizawl North Treasury Officer, Dr. Lalzahawma chuan ZALEN a hrilh danin, Aizawl North Treasury-ah mi pahnihin an pension an surrender tawh a. Heng zinga pakhat chu sawrkar hnathawk chunga Family Pension la a ni a, pakhat dang chu a thih tawh avangin a chhungten a pension chu an lo surrender a ni a ti.

Treasury Officer chuan Aizawl North leh South Treasury bakah District hrang hrangah Sensitization Team din a nih thu sawiin, team tinte hian dan loa Family Pension la mekte an in surrender theih nan awarness an nei dawn a ti.

 Sawrkar chuan Voluntary Surrender hun chhunga pension surrender lote chhui turin Task Force a din dawn a. Dan loa Family Pension la an hmuh chuan pension chu an tihtawp mai bakah dan angin hremna an lekkawh dawn a ni.