Tun hnai khan Mizo film hit tak mai 'Ka U Liana' tih chu dan loin mi tuin emaw a thehdarh tih hriat a ni a, ngawrh taka chhui a nih hnuah man chhuah a ni ta. Pawi khawihtu hi kum 22 mi Lalremsiama, Bethlehem Vengthlang, Aizawl a ni a, thubuai siam sak nghal a ni. Film siamtute leh a chhuah chhawnna OTT platform Runmawi App chuan cheng nuai 10 (Rs. 10 lakhs) chuang an hloh pha niin an sawi. 

Tun laia film lar em em mai 'Ka U Liana' hi May 29, 2022 khan Vanapa Hall-ah tlangzarh a ni a, release a nih atanga kar khat hnu lekah video hi Telegram lamah a darh zui. Hemi chungchangah hian film siamtu Zote Entertainment chuan hma an la nghal vat a, compaint an thehluh hnuah chak taka bawhzui niin pawi khawihtu chhuichhuah a ni ta a ni.  

Police Department chuan thuchhuah siamin,"Piracy hi dan bawhchhiatna, rei tak jail tan theihna a ni.
 Cyber Crime Police Station chuan rimtak leh ngun taka an chhui hnuah, 'Ka U Liana' tih film, pirated copy siama Telegram hmanga dan kalha lo thehdarhtu Lalremsiama (22), Bethlehem Vengthlang, Aizawl chu Iinformation Technology (IT) Act leh Copyright Act bawhchhiat thubuaiah an man. 

Tualchhung artists leh film siamtute support tur leh an thil siam chhuahte humhalhpui turin mipuite kan sawm a, piracy kan beihna kawnga min thlawp tlat turin kan ngen bawk a ni,
" tiin an tarlang. 

Mawh phurtu hi Aizawl District Basketball Association (ADBBA) a refree a ni nghe nghe. Pawi khawihtu Telegram account 'Melvyn YT' hi a account leh a account siamna phone number te chhui chhunzawm nghal a ni a, Truecaller atangin 'Ref Siama ADBBA' tia a lan avang leh technical investigation lamah a number neitu hi Lalremsiama, Bethlehem Vengthlang a nih thu hriat a ni. Aizawl District Basketball Association lam a?angin referee zingah Lalremsiama, Bethlehem Vengthlang a awm thu hriat a ni bawk a, Bethlehem Vengthlang khawtlang hruaitute puihnain zawn chhuah a ni ta a ni.

Cyber Crime PS hnuaiah S.I Lalmuanpuia leh a team te chuan accused hi manin, a digital device neih ang ang te nen Cyber Crime PS-ah hruai a ni. Ngun taka dawp a nih hnuah accused hian 'Ka U Liana' tih film hi dan ang thlapa Runmawi app atanga a lei thu leh, ni thum chhung chauh en theih a nih avangin a
thiante hnenah a account password te pein a entir ve a, a account hi an dil nasat avang leh ni thum a ral tawh dawn avangin screen record-a, a theih phei chuan a thiante hnena hralh chhawn leh a rilruk tak thu a inpuang a ni.

YouTube-ah te screen record dan inzir chawpin movie hi a record ta a, Telegram-ah thawnin a lo darh ta a ni. Cyber Crime PS Case No. 64/22 u/s 63 of Copyright Act & Sec 72 of IT Act siamsak niin accused hi man a ni a. He movie thehdarh kawnga inhnamhnawih ve midangte pawh chhui chhunzawm zel a ni.

Movie leh thil dang pawh pirate copy lo siam te, lo thehdarh te hi dan bawhchhiatna a ni a, IPC, IT Act, Copyright Act & Cinematograph Act adt. hmanga hrem theih a ni. Chuvangin mi thawhrimna leh insensona te zahsak a, pirate copy siam leh thehdarh ching lo turin mipuite an ngen tih Police Deparment chuan an tarlang.  Piracy hi dan chuan a ngai thutak hle a, hun rei tak chhung jail tan theihna a ni - lungin hial tan theihna a nih avangin mipuite fimkhur a ngai hle.