ZALEN October 16, 2024 : Central YMA Executive Committee-in thu tlukna a lo siam tawh angin ngin vawiin 16.10.2024 khan tunhnaia Transport Department hnuaia Aizawl DTO office atanga dan lo a Learner & Driving Licence pek chhuah awm ngeia an hriat chungchanga hmalaksak tura ngenna lehkha chu Transport Minister Vanlalhlana hnenah an theh lut.

Central YMA hruaitute chuan, tun hnai hun engemaw chen kalta atang khan, mi thenkhatte leh raltlan zingami thenkhat ten Driving License awlsam taka an nei mai thei thin chu chhui chiangin, mi engemaw zat an kawm chiang a. Heta tanga an thil hmuh chhuah chu, Mizoram mi leh sa dik tak zingami thenkhatte leh District Transport Officer (DTO) a thawktute in thu rualin, dan in a phut anga Learner & Driving Licence nei thei tura lehkha pawimawh (documents) thil tel ngai nei lo te hnenah Learner & Driving Licence pekchhuah a ni ngei tih an finfiah thu an sawi a ni.

Learner & Driving Licence siam duh te chuan hetiang siam theia in sawi Commission ho hnenah document engmah pek ngai loin an bituk zat pawisa tam tham deuh zawk an pe a, an ni hian Aizawl DTO-a thawktute hnenah a pangngaia pawisa chawi ngai aia tam pe ve leh in, an lo siam sak thin thu leh hetianga pawn lam mi Learners & Driving Licence siam sak thei tuten Deptt. lama thawktute pawisa an pekna evidence pawh Central YMA hruaitute hian Minister hi an hlan vek thu an sawi bawk a. Hetianga thil diklo ti thin DTO chhunga thawktu te leh pawnlam atanga commission lo ti thin office lam thurualpui tu te hi Central YMA chuan an hrechhuak vek tawh tih Minister hi an hrilh nghal ani.

Mizoram khawpui ber, Aizawla DTO in hetianga an tih theih chuan District dangah pawh hlauhthawn an neih len viau thu Central YMA hruaitute hian an sawi bawk a ni.

Central YMA ten hemi chungchanga hmalaksak tura Minister an ngenna lehkhaah hian, a enkawl Transport Dept. hnuaia dik lo taka Learner & Driving Licence pekchhuaha in hnam hnawite chu dan anga na taka hrem tur leh dan in a phut documents engmah nei lo leh Driving Test pawh paltlang miah lova, Driving Licence pek chhuah mi engemawzat an awm tawh hi a him loh avanga cancel leh turin leh tun hnua hetiang a thlen tawh loh nana rang taka hmalaksak turin an ngen a ni.

Heng bakah hian Ruihhlo phur thin Maxi Cab leh Public Carrier te ruihhlo an phurh nen a man te chu an public carrier license cancel thin tur te leh hnamdang motor, state dang registration nei passenger phur tur nilovin Mizoram hmun hrang hrang Passenger phur a an tlan thin chungchang te leh Lirthei neituten Garage nei vek tur anih chungchangah khauh zawk a kalpui tura ngenna an thlen tel bawk.