Aizawl March 30, 2023 : Vawiin khan MZP General General Headquarters Pisapui-ah MZP, Muslim Welfare Society Mizoram leh Central Mizoram Gorkha Youth Association (CMGYA) hruaitute chuan Joint meeting an nei a. Mizoram chhunga hnamdang dan lova sumdawnna kalpuite dapchhuah kawngah thawhho an rel. 

Meeting hi Lalnunmawia Pautu MZP President-in a kaihruai a, Mizoram chhunga hnamdang dan lova sumdawnna kalpuite MZP-in dapchhuah a tum mek chu Muslim Welfare Society Mizoram leh Central Mizoram Gorkha Youth Association (CMGYA) hruaitute chuan tha an ti a. A tul angin MZP hmalakna chu tawiawm a thlawp nise an ti bawk. MZP chuan Mizorama hnamdang danloa sumdawnna kalpuite chu an sumdawnna tihtawp a nih theih nan hmalak zel a tum a ni.  

MZP chuan tun hnaiah hnamdang dan lova sumdawnna kalpui hi a hluar hle an ti a. Mizo hming hawha sumdawnna bakah, state pawn atangin man tlawmte tein phalna neilo ten Mizoram chhungah sumdawnna an kalpui nasa a, an bungrua an hralh zawh hunah an haw leh mai zel tih an hre bawk. Hei hi tualchhunga Mizo sumdawngten an tuar a, nghawng lian zawk a neih hmaa tihtawp a nih theih nan hmalak a tum.

Hnamdang dan loa sumdawnna kalpuite dapchhuah chungchang hi MZP Special Assembly February 9, 2023-a Borapansury Zofate Chawlhbuka neih-ah rel a lo ni tawh. MZP chuan, “Mizoram chhunga hnamdang dan loa sumdawngna kalpui mekte hi MZP-in dapchhuah nise, Mizoram sawrkar-in a tihtawp theih nan hmalak ni rawh se, tih bawhzuina kal mek a ni," an ti.

He hmalaknaah hian MZP chuan a tul angin pawl dang pawh meeting pui zel a tum a, ram leh hnam tana hmalakna a nih avangin Mizo mipuite thlawpna an ngen nghal bawk.