Aizawl: Legal Metrology department chuan May 3, 2016 atanga May 31, 2018 inkar chhung khan dan lova zawrh sikret (contraband cigarette) Rs. Nuai 50 chuang hu an man tawh a. Heng sikrette hi Maynmar atanga lo lut chu a tam ber a ni. Legal Metrology department thawktute hnen atanga thudawn danin an department bakah Police (CID), Mizoram State Tobacco Control Society leh Taxation department tangkawpte nen dan lova sikret lakluh hi an dap thin a. Hma an lak tirh May 3, 2016 atanga World No Tobacco Day (May 31, 2018) inkar chhung khan dan lova zawrh sikret vai hna hi tum 54 neiin sikret packet 166982 leh churut tlawn 7034 an man a, an thil man hlutzawng hi Rs. 50,44,630 hu a ni. Legal metrology hian an thil man zinga sikret bawm 118279 chu tiral (dispose) tawhin churut pawh tlawn 5184 an tiral tawh a, a bang hi an la kawltha niin Zalen palai an hrilh. Legal metrology thawktute chuan sikret an man te chu Aizawl ah chuan Legal Metrolgy Controller-in tihral theihna a nei a, district-ah chuan Deputy Commissioner-ten an tiral thei niin an sawi a. Sikret te chu incinerator-a halral emaw, tuia leih huh hmangtein emaw an tichhe mai thin niin Zalen an hrilh. Zawhna chhangin sikret an mante chu a siamtu hming, siam ni leh kum, a man zat, size leh hlauhawm chhinchhiahna (signage) tarlan tur a ni tiin hengte hi a awm loh avangin dan a bawhchhia a, chuvangin an man ta thin niin an sawi bawk. Dan lova an man sikrette chu Myanmar siam an ni deuh vek nia sawiin Zokhawthar kaltlanga lakluh an ni tlangpui niin Legal metrology thawktute chuan an sawi a. Sikret an man zingah Valiant, Windbody, Farstar, Hummer leh Peacock te chu a lar zualte an ni tih an sawi a. Tun hnaiah sikret chu an man tlem tawh niin Zalen an hrilh a, hetia man tur a vân chhan hi a zuartuten an thukruk thiam tak vang nia an hriat thu Zalen palai an hrilh bawk.&&&&