Aizawl; Sawrkar officer lian ten dan lovin MR 155 an chhawr nia The Frontier Despatch chanchinbu ah tarlan ani a. Hetih lai hian SAD thawktute chuan dan ang takin MR te chu chhawr an ni tih Zalen an hrilh. Sawrkar atanga hlawh la officer lian thenkhat chuan dan mumal awm lemlovin an chenna In ah household peon an kawl a, an hlawh atan kum 1 ah Nuai 100 chunglam senral a nih thu Zalen thulakna chuan a tarlang. Civil Secreteriat officer thenkhatin peon an kawl theih dan a awm em? tih zawhna chu Secretariat Administration Department chuan household peon awmpui theihna dan Civil Secretariat a official te tan a awm lo nia an hriat thuin an chhang tih Zalen thulakna chuan a tarlang bawk a ni. Officer 152 in an chenna Inah peon/awmpui 155 dan tlawhchhan mumal awm lovin an chhawr tih leh Officer thenkhat household peon kawl thei chin awm bawk mahse officer te chuan an peon neihte 'detail' chu SAD ah chipchiarin an thehlut lem lo nia ziahlan a ni a, peon te bank account leh electoral roll thehluh mumal a awm loh avangin heng mi chhawr te hi official te'n an hlawh hi anmahni sum atangin an pe nge, sawrkar sum atangin an lakchhuah sak? tih chu thliarthiam a har hle niin The Frontier Despatch chuan a ziak lang bawk. SAD ah peon te detail thehluh fumfe a nih loh vang hian peon te chu a takin chhawr an nih leh nih loh finfiah theih a ni lo niin Despatch chuan tarlang bawk a ni. Kum 2013 atanga hman tan Minimum wage Rs 220 anga chhutin household peon te tan nitin Rs 34,000 an la thei a, kum 1 ni kima chhutin Rs Nuai 100 chuang seng ralin, official pakhat tan kum 1 ah Rs 80,000 dawn hmanral a nih thu tarlan a ni bawk. Thlarau MR chungchangah hian Zalen zawhna chhangin SAD thawktute chuan household MR chu sawrkar phalna a kawl an ni tih an sawi a. MR hi nei tawh lo tura tih ni mahse Officer ten neih chhunzawm phalsak turin Finance Minister ah an thlen a, titawp lovin an titlem ta zawk niin an sawi.