ZALEN May 19, 2026: AIOCD (All India Organisation of Chemists & Druggists) ten naktuka All India Strike neih tura ruahmanna a siam chungchangah Mizoram Chemists & Druggists Association (MCDA) chuan Online Pharmacy hrim hrim an do a ni lo a, India sawrkarin online-a damdawi zawrh danah rules and regulation tha tawk a awm lo chu an duh loh ber a ni an ti a. An hamthatna tur duh vang ni lovin mipui himna an ngaihpawimawh vang anih thu an sawi

MCDA ten vawiina Aizawl Press Club-ah chanchinthar lakhawmtute an kawmnaah India ram puma strike an huaihawt chhan chu 2018 atanga kalpui phal Online Pharmacy-ah hian dan mumal awm loh vang a ni an ti. Heng online a damdawi zawrh te hi company tha siam ni lo, a ang chiaha siam damdawiin a tam em em a, heng damdawi zingah hian a nih tur ang ni lo hmuhchhuah pawh a awm fo tih an sawi.

Pharmacist tel lova dawr hawn pawh phal a nih tawh lo lai a, hetiang tunge an ni tih pawh hriat loh te damdawi zawrh lo lei ringawt hi a him lo a, a zuartute hi hmelhriat pawh ni mah se, a rawn thawntute hi tu te nge an ni tih hriat a ni tawh lo a, Mizoram-ah a endikna mumal a awm loh avangin thil pawi tak a then thei tih an sawi.

MCDA hruaitute chuan online pharmarcy hi hetianga dan mumal lova a kal reng chuan damdawi ruihhlo chi hrang hrang hi chah theihin a awm hun a la awm a, hetiang hi a thleng anih chu tuna sawrkar leh YMA ten an buaipui em em ruihna atana hman damdawi te hi thunun zawh rual a ni dawn lo, an ti.

MCDA te chuan strike chhung hian Hospital huamchhunga Canteen awm te chu he dawr khar tur tih hian a huam tel lo an ti a, strike neih avanga buai loh nan mamawh tur damdawi te lo lei lawk turin MCDA (Mizoram Chemists & Druggists Assn) chuan mipuite an ngen a ni.