Aizawl: Nimin khan Ferrando Integrated Women Development Centre leh a thurualpui mi thenkhatte chuan Aizawl Press Club ah chanchinbumite an kawm a, Awmpui (domestic worker) chungchangah dan mumal tak siam an duh tih an sawi. FIWDC hotute chuan Mizoten awmpui kan tih mai 'domestic worker' te chu sekrek engkim khawihtu leh an tel lo chuan chhungkaw kalphung buai vek thei anih avangin hna zahawm a ni tih an sawi a. An hnathawh kan mamawh viau laia mi tam takin tihduhdah an tuar te, hlawh pe thalo an awm te, chawlh an nei lo lutuk te chu siamthat a ngai nia an hriat thu an sawi a. Awmpui hna hi hna zahawma siam anih chuan Mizo thalai, lehkha zir tawhlo te tan hna thawh tur tha tak siamsakna tur niin an sawi bawk. FIWDC chuan zirchianna an neih ah Aizawl khawpui chhungah mi ina awm 'Awmpui' 500 vel an awm a, an zinga a tam ber hi Bru an niin Ranglong leh Myanmar lam mi engemaw zat an awm bawk niin an sawi.