ZALEN November 19, 2024 : MNF Treasurer Lalruatkima'n "ZPM sawrkar chu sawrkar hnathawkte nêkcheptu, aikal lak khap, Office tan hun leh ban hmaa chhuahsan phallo leh an awmna chin hriat theihna Apps an hmang tan dawn a, sawrkar hnathawkte an beidawng mek a, MNF sawrkar leh hun an nghakhlel hle," tia a sawi ta mai hi ZPM Thalai chuan mak an tih thu thuchhuah an siamah an tarlang.

Ex. Minister thusawi hi MNF PR No 188/2024.Dt.18.11.2024 -ah tarlan a ni a, ZPM Thalai chuan he a thusawi hi a ngaithlatu mipuite tan a hrilhhaithlak dawn hle ah an ngai a. Minister ni tawh tawngkam atan chuan thil mawilo leh inhmehlo tak nia an ngaih thu an tarlang bawk.

ZPM Thalai Headquarters chuan, "Ex- Minister Pu Lalruatkima hi MNF Treasurer ni lai mek niin, Mizoram (MNF) sawrkar-ah Minister nihna hial lo chelh tawhtu a ni a. Hetiang Dân pawisak lohna chungchang a sawichhuak ta mai hi, MNF sawrkar lai Department a chan thin ah te khan Dân zawm kawngah a lo ngaihtuahawm thin zia a pholang chiang hle ah kan ngai a ni," an ti.

ZPM Thalai Headquarters chuan, "ZPM mipui sawrkar kan hrawn mekna hnuaiah hian kan sawrkar hnathawk te leh Mipuite pawh an hlimin an thlamuang a, an hnathawh hlawh an lak danah pawh an lungawi a ni. ZPM sawrkar-ah beiseina sang tak nei a, thahnemngai taka an sawrkar hnathawkte an thawh lai a, Dân pawisa lo tura fuihpawrh hi MNF Party-te hian sim se kan duh hle a."

"Sawrkar hnathawk, mipui rawngbawlsaktute rilruah rinawmlohna leh zelthelna rilru tuhsak duhna thinlung hi MNF party hruaitu leh Minister hial lo ni tawh Pu Lalruatkima hian pu tawh lo se, Office kalphung dân leh dûn hriatna kawngah leh Dân pawisaklohna ata harhchhuak turin MNF Party te a ngên tak meuh meuh a ni," an ti bawk.