The Mizoram Selection of Candidates for Higher Technical Courses 2015-a Category I-a awm thin Chakma te chu Category II ah kum tir lam khan dah an ni a. Mizo zirlaite’n techinical zir tura ‘chance’ tha an neih na’n herrem nia sawi a ni. Gauhati High Court-ah Chakma Student's Union te'n thubuai an thehlut phah bawk. H&TE Department in dan ennawna Category-I a Chakma zirlaite a dah let leh vangin ‘thubuai ngaihtuah tur awm lo’ tiin court chuan tun hnai khan a ti tawp ta a. Chakma zirlaite, he dan hnuaia category-II a sorkarin a dahna chu HC chuan dinchan tir zawk mahse Court in thu remna a chhuah hmain thubuai awmna chhan ber chu Department in a siam tha hman si a, tunah hian dinhmun lai deuhah zirlai leh sawrkar a awm phah a ni. STEE result chhuakah Chakma zirlai 38 chu Category I atangin an tling a, hei hi duh lovin Mizo Zirlai pawl te chuan sawrkar chu siamtha turin an kar a, buaina a chhuak a, boruak pawh a sang hman hle a, MZP hruaitu jail lama dah thlak hial an nih kha. He dan hmanga Category then a nih dan leh a huam chin sawifiahna chuan khel a hlawh hman viau a, 'leilung fa' (indigenous) hrilhfiahna chu inhnialna siamtu a ni. Mizo Zirlai Pawl te’n dan siamthat an phut chhan chu mahni ram chhungah Mizo zirlaite hamthatna paihsaknaah an ngai a. An phut ang hian 'Zo-ethnic ram leilung neitu te' tiin Category I chu tihdanglam a ni a. Chakma zirlai inham tanna ' Mizoram chhunga cheng nghette' tih chu thlak a nih vangin Category II ah nawrthlak an ni ta a. Chakma zirlaite'n High Court kal vang hian STEE hnuaia hmalakna pawh hun engngemaw chen a chawlha nih kha. Hetih lai hian Chakma te chuan tunhmaa an dinhmun atanga phahthlak niah an inngai ve thung a, India dan puiin a duh loh hnam inthliarnaah an ngai ve thung. He thu Court in a ngaihtuah chhunga H&TE in Chakma te Category II a a dah tawh suta Category I-a a lo hlangkai hman hian rilruah zawhna a siam a, thubuai luh chhan ber sawrkarin a sut leh hi mipui hrilhfiah a tul khawp ang. HC in Category II a Chakma te dah an nihna a dinchan tir leh lawi bawk si nen; H&TE hi a hmanhmawh deuh em? tiin zawhna a awm a ni. Za a za (100%) thil tisual thei lo an awm lo nangin tunah tak hian zirlai, nu leh pa terilru a phawklek a, thenkhat rilru a hliam thei bawk. Category II a Chakma an awm chu dinchan tir zawkna changchawiin sawrkar hian siamthat tum leh se, Chakma zirlai lam hian an khing leh duh mai thei a, hmalakna chawlhsan turin H&TE court in ti leh se a tuar tur chu zirlai tho an ni a; court hian a ngaihdan hran a nei hman thei bawk. Dan lam mithiamte'n ngaihdan an siam thei anga, thil a nihphung a lan thuai beisei ila. Engpawh nise , hemi atang hian zirtur a tam mai a, Dan siam a nih dawnin leilung fate hamthatna chu dah pawimawh a ni fo thin a, a chhunga chengte chu hnufual an nih phei chuan a awm lohna a awm lem lo. Dan siam dawnin hun lo awm zel tur rilruah lian ber sela, khin thlak theih mai a nih lohna turin hmathlir a pawimawh hle. Tun dinhmun thlen tirtu ‘dan’ nilo, thil dang kaihhnawih ‘dan’ dangah pawh harsatna a awm thei a a ni. Engtik ni ah engmaw tuna zirlaite kutah hian kan ram hi a awm dawn a; hma hun thlirin tun hunah hian remchang siamsak a pawimawh ber a; min dem lohna turin theih tawp chhuah a tul hle mai. Tun dinhmunah hi chuan finrawl chhuah thiam a tul hle a, tuna Mizo zirlai pawl te'n an duh loh 'dan' hian leilung fa dik tak te a humhalh a tha ber a; chuti lo chu khawvel ngaihdan a zau tawh si a ri buan buan lovin finrawl chhuah a ngai a, zirlai pawl leh sawrkar tanrual hun lai tak a ni e.