ZALEN May 17, 2026: Supreme Court thupek angin bawlhhlawh paih dan thar, Solid Waste Management Rules, 2026 ang chuan bawlhhlawhte chi li - tawih thei, tawih thei lo, sanitary leh special care waste-ah thliar a ngai tawh dawn.

ZALEN thudawn danin Solid Waste Management Rules, 2026 thar hi Aizawl-ah chuan Aizawl Municipal Corporation, Lunglei-ah Lunglei Municipal Council, urban town-ah UD&PA Department leh a bak khuaah chuan rural development department-in mawh an phur dawn a ni. 

Aizawl Smart Cities Ltd. thawktute sawi danin dan thar hi April 1, 2026 atanga hman tan tur a ni a. Bawlhhlawhte chu chi li-ah thliar hrangin tawih thei (wet waste) chu a hring, tawih thei lo (dry waste) chu a pawl, sanitary waste (diaper etc) chu a sen hman tur niin heng bawlhhlawhte hi a bika halna tur incinarator-ah hal tur a ni a. Hei bakah hian special care waste awm bawkin hengte hi rawng bur, damdawi bur etc. te an ni a, a hranpaa thliar a ngai tawh dawn a ni.

Solid Waste Management Rules, 2026 ang chuan mi 100 aia tam punkhawm a nih dawn chuan a hma ni thum la awmin ULP (Aizawlah chuan AMC) an hriattir a ngai dawn a. Bawlhhlawh siam chhuak tam (bulk waste generator)-te mawhphurhna siamsak niin hei hian building zau zawng 20,000 sq.m chin chung lam emaw, ni khata tui litre 40,000 hmang chin emaw, ni khata bawlhhlawh kg 100 siam chhuak chinte a huam dawn a. Hetiang hi Aizawl-ah chuan Assam Rifles, Mizoram University leh a hlawma awmte a huam dawn a ni.

Bulk waste generator-te hi dan thar ang chuan ULB-ah inziah luh (register) a ngai a, bawlhhlawh tawih thei anmahniin an thehthang a ngai dawn a, an theih loh chuan ngaihhnathiam dilna (exemption certificate) an dil a ngai dawn a. Hei bakah kum tin June 30-ah annual return an thehluh a ngai bawk dawn a ni.

Dan tharah chuan tun hma atanga bawlhhlawh lo chekkhawl (legacy waste) chu October 31, 2026-ah chuan zirchian vek tawh tur niin heng bawlhhlawh chin fel dan tur hi ULB-in ruahmanna (action plan) a siam ang a, an chin fel dan chu Pollution Control Board-in an endik thin dawn a ni.

Dan thara thil langsar tak chu bawlhhlawh hi in tinah khawn (door to door collection) ngei tur a ni a, dan zawm lote chu hrem tur an ni.