Mizoram Dance Sports & Movement Championship chu naktuk June 27 hian Dawrpui Multipurpose Hall-ah tan a ni dawn ta. Mizo Dance Camp leh Mizoram State Sports Council buatsaih niin, Mizoram Rural Bank chu main sponsor an ni. Intihsiak tan ni hian Jump Rope leh Aerobics prelims neih a ni ang. 

He event hnuaia intihsiakna thenkhat chu online hmanga tan a lo ni tawh a, a main event hi ni 4 chhung awh tur niin, Zirtawpni, June 30 zan hian Grand Finale neih a ni ang. A hmunah a duh apiang tan en theih a ni dawn a, TV leh YouTube lamah live-a pek chhuah a ni bawk ang.

Aerobics
Aerobics hnuaiah hian group leh solo intihsiak tur a ni a, group-a tel tur hriat tawh zingah hian HBC Cheerleaders leh GAC Cheerleaders te an telm - intihsiak boruak a sang chho hle tura ngaih a ni. A hmunah pawh la in ziah luh theih a ni ang. Fitness aerobics, gymnastic aerobics leh acrobatic movements te pawh a leng vek a ni.

Aerobics endik tur hian Mizo zinga fitness leh aerobics instructor rual, an mahnia studio neih thah an thu dawn. Chungte chu Nutei Pautu (Fit In Dance Studio), Misty Hruaii (Lay Up Fitness Studio) leh Esther Chhakchhuak (Fifi Fitness Studio) te an ni.

Jump Rope
Jump Rope ah pawh hian a tel tur inziak lut tawh te hi tunlai Mizo thalai zinga a thiam tak tak te an ni hlawm a. Freestyle niin, mipa leh hmeichhia a hrana intihsiak tur a ni ang. Endik tur hian Samuel Liansanga a thu dawn a, ani hi Badass brand nei tu, a jump rope skills avanga India ram chhung leh pawn thlenga hriat lar a ni.

Heng event hrang hranga Final Round te leh MDC Team leh Judge te showcase chu Zirtawpni zan dar 7:00 hian neih a ni ang.