Mizo music platform thang duang tak, Darbu Music App chuan kumin chhungin artist te hnenah Rs. 15 lakhs (nuai 15) chuang zet an semchhuak tawh. Darbu Music App hian artist ten streaming platform dang atanga an sum hmuh a tam loh zia hriain, Mizo artist te tan liau liau app hi an duang a ni. Artist ten an thiamna phua music hmanga sum lakluh tam zawk an neih ve theih nan tan an la a, hla pakhat Rs. 15 a zuar in, mipuiten an hlutsak zia a hmuh theih a ni.

Darbu Music App-a hla zawng zawng hi lei ngai a ni vek bik lo a, a thlawn liau liaua ngaihthlak theih hla eng emaw zat a awm. Hla thar release erawh artist te support nan Rs. 15 a lei theih a ni thung. Darbu atang hian top artist zingah - K. Hminga, Youngfella, Aengi & Rosalyn ten he platform kaltlang hian thla khat chhungin Rs. 1 lakh (nuai 1) chuang an lalut hman a, he platform kaltlang an hla release tum artist lian tak tak an awm chho mek zel bawk.

Darbu hi Mizoram chhung chauha hman tura duan ni mah se, Mizoram pawn mai ni lo India ram pawna Zofa ten an hlut em em a, US atang te, Asia ram hrang hrang atangin Rs. 40,000 chuang hmuh a ni tawh.

Darbu Music App hian artist te hla an hralhna atangin 90% chu artist te hnenah an pechhuak a, 10% chu amah in tunnun nan an hmang ve thin. Artist te hla mai bakah an merchandise hralhchhuahna platform ni turin hma an la mek bawk.