ZALEN, October 04, 2025: Darlawnah Zirtawpni zan atanga Salvation Army thalai pawl, Salvation Army Youth (SAY) India Eastern Territory Congress vawi 27-na hman mek a ni a, Inrinni thleng khan palai 4,700 chuang an ni tawh.

SAY Congress-a palai in-report tawh bakah hian inkhawmpui hian hmarchhak pum a huap avangin kawng chhia leh harsatna dang avangin Zirtawpnia palai thlen huna thleng hman lo tam tak an la awm a, an thlen belh zel.

Congress tan zanah hian Welcome Meeting-ah Chief Secretary Lt. Col. Masilamani Stalin chuan inkhawmpui hi Pathian hnenah a hlan a, ‘Krista ang tura tihdanglam - amah hriat chiannaah’ tih thupui hmangin thuchah a sawi bawk.

Inrinni chawhma leh chawhnuah Praise Meeting neih a ni a. Chawhmaah hian Lt. Col Vanlaltluanga, Secretary for Personnel Administration chuan ‘Krista ang tura tihdanglam - Thil tinrengah’ tih thupui a sawi a, chawhnuah hian Lt. Col Vanlalsawmthanga, Secretary for Business Administation-in ‘Krista ang tura tihdanglam - thutiama rinawmnaah’ tih thu a sawi.

Inrinni zanah hian Tawngtaina Inkhawm leh Variety Programme hman a ni dawn a, Major Richard Vanlalnghaka, Territorial Youth Secretary-in thuchah a sawi ang.

SAY Congress hi Pathianni zana Chhandamna Inkhawmah a tiak ang.