ZALEN June 7, 2024 : Lok Sabha MP ni ta Richard Vanlalhmangaiha'n Defamation case a thehlut Mizoram Police ten an chhuina kal zelah nimin tlai khan David Sailo ni ngeia hriat R. Lalchhuanmawia S/o R. Lalsangliana, Galili Veng, Zemabawk chu Judicial custody-ah a awm mek.

Mizoram Police Cyber Crime te chuan he case hi Non-Cognizable case anih avangin thuzawh fiah tura koh bak tih theih an neih loh thu a sawi a, mahse, Court chuan Cognizable case-ah a let tak avangin an chhui ta tih an sawi. Rinhleh hrang hrang an neih te sawr zim zelin a tawpah tuna an man tak R. Lalchhuanmawia hi man a ni a, mahse, ani hian tun thleng hian David Sailo anga puhna hi a la pha thung.

Richard Vanlalhmngaiha chuan a chanchin an ziah danah mi pathum, David Sailo, Tuesday Nightmare leh Tlanghmingthanga, Mission Vengthlang te lakah hian Defamation case hi a file a, Cyber Crime Police te chuan Tuesday Nightmare leh Tlanghmingthanga te chuan tha takin an thawhpui tih an sawi a, David Sailo hi an hriat lawk theih loh avangin case hian hun a duh tih an sawi.

Mizoram Police te chuan Facebook te nen an tanho hnuah David Sailo Account leh phone number inthlunzawm te chu R. Lalchhuanmawia phone ngei a ni tih an chhui chhuak a, mahse, ani hian a pha thung. May 31, 2024 khan R. Lalchhuanmawia hi Police te hian an la a, zan khat an kawl hnuah June 1 khan chhuah leh a ni a, June 4-ah an man leh a, an man hmasak leh an man nawn inkarah hian David Sailo account hi tum tam tak tihchhiat tum anih thu an sawi.

Police te chuan Digital evidence a bo theih avangin Phone number hi an tarlang duh lo tih an sawi a, David Sailo account nen inzawm phone number hi an ring pawhin R. Lalchhuanmawia phone ngei-ah hian a ri chhuak tih an sawi bawk a, police chuan finfiahna hi nei tha tawkah an inngai a, mahse, R. Lalchhuanmawia hian David Sailo nia puhna hi tun thleng hian a la pha thung a, Police te chuan Court thutluknaah engkim a innghat tawh tih an sawi.

State Project Director, Samagra Shiksha, Mizoram Lalhmachhuana chuan R. Lalchhuanmawia S/o R. Lalsangliana, Tuirial RMSA High School-a Headmaster (Non-functional) hi thubuai nei lai anih avangin suspend na order a tichhuak ve bawk.