Tun hnaiah Mizoram sawrkar, Horticulture te hmalakna in, Ngopa, Lamzawl leh Pawlrang khua te thar Dawnfawh pum 6500 chuang chu Vegetables Supply Chain hmanga lakluh niin, sawrkar chuan heng thlai te hi a hralhchhuah sak a, a tharchhuaktu lam tan chuan thil lawmawm tak a ni ngei ang.

Lockdown lai a nih avangin heng Dawnfawh thartu te hi an mangang hman hle a, a hma lama lei saktu tura an biakrem tawh te chuan Lockdown boruak avangin an thulh san leh a, an Dawnfawh te hi hralh hun an nih tawh avangin a tih ralna tur kawngah an buai hman hle, hei hi an hmuna kalchilh media mite leh Saitual DC hnenah pawh an lo sawi dan a ni.

Saitual DC hian theihtawpin sawrkar lamah hma a lakpui a, sawrkar hotute hnenah thlenin, bialtu MLA hmalakna a zarah Horticulture lam chuan a tih ralna hi Vegetables Supply Chain kaltlangin an ngaihtuahsak ta a ni.  Thal tui harsat lai zawnga tui mamawh tak dawnfawh harsa taka an tharchhuah hun khirh tak kara an tiral thei hi an lawmpuiawm tak zet a ni.

Vegetables Supply Chain hi nikum lama Lockdown kan hman chhoh tirh khan mipui tan a tangkaiin a hlu hle a, chumi piah lamah kuthnathawktuten man man zawkin an thlai te an hralh theih phah a, sawrkar lam pawhin chhunzawm zel an tum thu chanchinbu leh TV chanchintharah pawh tarlan a ni thin. Khatih lai kha chuan a thlai a zirin phai lam atanga rawn lut chawhmeh thenkhat te pawh tihtawp a ni hial a, Mizoram kut-hnathawktu hmun hrang hranga mi te chuan an hlawkpui thu pawh hriat a ni.

Mahse, sawrkar hian tun tum Lockdown-ah hian Vegetables Supply Chain hi mumalin a chhunzawm ta lo a, a lehlam takah chuan kuthnathawktute tan chuan a uihawm hle thei awm e. Hetianga Dawnfawh hralhna tur hre lo te tana ke an rawn penchhuak leh erawh a lawmawm hle. Ngopa lamin Dawnfawh an thar vanglai hi chuan hmun dang atanga rawn lut tur te hi dahchah sak thin ni se an tan chuan a lawmawm hle ang. Chutihrual chuan kan Mizo kuthnathawktu lam hian kan thlai thar man chhiar dan tawk hi kan hriat ve erawh a tul hle.