ZALEN June 16, 2026: Dawrpui Local Council, YMA, MHIP leh MUP telna, Dawrpui Joint Committee chuan an veng ramri chungchanga Chhinga Veng Thalai Pawl-te chet danah lungawi loin, vawiin khan Aizawl Police Station-ah FIR an theh lut a, a rang thei ang bera hma laksak turin thuneituten an ngen.

Dawrpui Joint Committee hian tukin khan Chhinga Veng Thalai Pawl intite chu Dawrpui Veng chhungah tlangau hial khawpin thalai tamtak an inhawr khawma. Sorkar Gazette (The Mizoram Gazette Vol. XXIII Aizawl, Friday, 29.4.1994, Issue No. 59) zah lo takin Dawrpui Veng chhung ngeia dawr te anmahni tala-in an kalh sak a, poster an tar nghal zel bawk tih an sawi. 

Chhinga Veng thalaite hian placard keng chungin au rinna hmanga kawng zawhin signboard thenkhat te an ti chhia a, tharum thawh duh mai na rilru pu leh tawngkam na takin Dawrpui tual laiah ngei Dawrpui khawtlang mipuite cho taka an che chu Dawrpui khawtlang chuan na an tiin hriatthiam har an ti hle tih FIR-ah hian a tarlang.

Dawrpui Thlanmual (Land Lease No.: DLL-62 of 1990) signboard lian leh thil tar zawng zawng chu diriam taka la thlain an ti chhia a ni. He thlanmual hi Dawrpui mai bakah Dawrpui Thlanmual Committee: Dawrpui, Saron Veng, Armed Veng, Armed Veng South, Tuithiang leh Chhinga Veng te intawm thlanmual a ni a, Dawrpui hi pass holder an ni a, Hetianga thlanmual zah zo lo a an che hi pawi an ti hle tih Dawrpui Joint Committee chuan an tarlang.

Dawrpui khawtlang chuan an dawr kalh saktak te chu a hma thei ang bera hma laksak a, Thlanmual signboard an lak thlak pawh a hma thei ang bera dah let leh tura hma laksak turin Police-te an ngen a ni. Hetianga an veng chhunga Chhinga Veng thalai intite chet dan hi evidence (fiahna) tha tawk tak an neih thu sawiin, ramri chungchanga buaina hi a serious (a thutak) hle a, he ramri hrechiangtu ngei Case Information Officer atan pe tur leh an FIR thehluh chu pawmsak a, rang taka hma laksak turin thuneitute an ngem a ni.

Hetihlai hian Aizawl Municipal Corporation chuan naktuk June 17. 2026 hian Dawrpui leh Chhinga Veng ramri buai chungchangah meeting a kova, AMC executive corporators, ward bialtu B Lalawmpuii, officials pawimawh dangte leh Chhinga Veng leh Dawrpui local council member te leh NGO aiawh te an tel ang.