Aizawl April 10, 2023 : Vawiin khan BJP Mizoram chuan karthar inhlanna leh Political Session an nei a, State President Vanlalhmuaka in thusawina hun a nei a, Dawt hmanga BJP beitu te mipuiin an la kawk dawn, a ti. BJP CADC President Dr BD Chakma, MLA chuan CADC Election lo awm tur atana BJP dinhmun a sawi bawk.

Vanlalhmuaka chuan, "Mizoram ah BJP Sawrkar a din theih nan theihtawp chhuahin kan thawk a, chu chu mahni kan inngaihtuah hmasak vang nilovin, Mizoram retheihna khur ata khaichhuah anih theih nan, BJP ah hian kan awm mai a ni. Mi tamtak chuan BJP chu hre fuh lovin, dawt hmangin min bei thung a, a pawi hle a ni. Mizoram-a Political Leader tin te hian an mimal ngaihdan chuan BJP hi tha ti lo an awm miah lo tih hi an thusawi tawh te atangin a hriat theih a, nimahsela mipui avangin tha an tih te hi thalo an ti ta mai thin a ni. Chung Politician te chu chinghne beram vun sin ang an ni. Nakin lawkah chuan Mizoram mipui hian min la fak hun a thleng dawn a, Dawt hmanga BJP beitu te erawh anmahni avanga hun reitak rethei a an awm avangin an la kawk thung dawn a ni,' a ti.

Hmuaka chuan Narendra Modi chu Kristian te ngaihpawimawh nia sawiin,"Kristian te ni pawimawh Easter Sunday-ah pawh Prime Minister dang ang lo takin, India Prime Minister nih tlin tak Modi a chuan Kristian te zingah inkhawmna neihpuiin India ram chu Secular India kan nih zia a lantir a, Congress hunlaia Prime Minister ten an tih ngai loh thil a ni. Prime Minister Narendra Modi erawh chu India ram Prime Minister a nihna hi nitin alang thin. Mizoram mipui te kan harh a hun, khua kan tlai tawh, kan tlai lutuk hma in kan ram leh hnam leh sakhua a him nan BJP Sawrkar Mizoram ah kan neih theih nan, theihtawp chhuah turin kan in sawm a ni," a ti.

Dr. BD Chakma chuan CADC Election lo awm tura BJP dinhmun sawiin, "CADC-ah BJP chuan sawrkarna ngelnghet tak kan din ngei dawn a, CADC mipui te zarah CADC-ah chuan BJP Sawrkar ngelnghet tak kan siam dawn a ni. Tin, Mizoram mipuite harsatna sutkian anih theih nan sawrkar tha kan mamawh a, Mirethei te tana sawrkar tha a awm theih nan BJP sawrkar kan mamawh a ni. ADC mai nilo Mizoram pum damna turin BJP sawrkar lo chu Party dang reng reng sawrkar an awmlo va, chumi anih loh chuan vawiin a kan retheihna aia nasa hi Mizoram hian kan hmachhawn dawn a ni," a ti.