Ram zawng zawngin an buaipui zing ami chu ruihhlo leh zu hman sual tam lutuk hi a ni mek a. Chhungkaw tam takin an tuar mek a, ramin nasa taka a tawrh thin avangin thenkhat phei chuan dan khauh zawk hmangin an bei mek a, a zuarte chu dan hnuaiah tihhlum an ni mai thin a ni. Hetiang chung pawh hian ruihhlo phei chu do rem a har hle a, a pung tual tual emaw tih mai tur a ni fo thin a ni.

Mizoram pawhin tunah hian ruih-hlo leh zu dolet tumin puan ven a sawichhing mek a, kan ram hruaitu lu ber Chief Minister chuan tun hmaa sawrkarin a enkawl hleih theih loh, Sethawn hmun chu thar thawh leh a, India rama inenkawlna hmun lian ber leh tha ber atana chhuah a tum mek a ni a, ngawl vei 80% lai chu khung khawm tum a nih thu a sawi bawk a ni. Rilrua awm ta chu project lian tak tak, tha awm taka lang si hi a taka tihhlawhtlin theih a ni meuh em? tih hi a ni a. Ngawlvei sang tam tak hmun khata khung khawma ‘damna pek’ hi thil theih a ni chiah ang em? tih pawh ngaihtuah zui tham tak a ni.

Hetiang project lian nei tur hian thiamna sang zawk hmanga zirchianna neiin ke pen theih nise a duhawm a, tuna kan tum dan hi chuan ‘arkhaw thim dai’ a kawk deuhin a hriat a ni. De-addcition centre ngat phei hi chu a tlangpuiin in-patient nei tam ngai lo an ni a, ngawlvei dam mek chu a tam zawk niin out-patient anga enkawl an ni a, pawn lama nun pangngai nei turin zirtirna pek an ni thin a ni. India rama centre tha anga sawite pawh hetiang hi an kalphung a ni tlangpui a, ngawlvei rual za tam tak chu sawi loh, sang rual khungkhawma enkawl chu an tlin bik a rinawm loh a ni.

Kan CM thahnemngaihna hi a fakawm a, hetihlai hian project a len lutuk chuan kan tum ram kan thleng lo thei a, centre lian tak si, changtlung si lo, a hnua enkawl fumfe hleih theih loh hi kan ram hian kan nei luah ringawt ang tih a hlauhawm a ni. Hmun khata centre lian tak din ai hian district tinah hian kan enkawl zawh tur changtlung zawk din ila hma kan sawnpui zawk ang em? tih pawh rilruah a awm e!