Interview-naah De Bruyne  chu zawhna chi hrang hrang an zawt a, chung zinga zawhna pakhat chu football khelhpuiah Messi nge Ronaldo a duh zawk tih an zawt a. Manchester City playmaker Kevin De Bruyne chuan, an pahnih karah pakhat zawk chauh khelhpui theih an nih chuan Lionel Messi aiin Manchester United forward Cristiano Ronaldo a thlan zawk thu a sawi. 

Belgian international hian Ronaldo a thlan zawk chhan chu Portuguese hi chu forward a ni a, Messi erawh an khelhna hmun a inan deuh vang a ni mahna. Zawhna chhangin De Bruyne chuan,"Mual chhunga khelh pui tur chuan Ronaldo hi ka thlang zawk ngei ang, a chhan chu striker pangai ang tak takin a awm thei a, Messi hi chu tun thlengin playmaker ang deuh hian a la khawsa thinin ka hria. Kei pawh playmaker ka nih ve bawk avangin striker chu ka tan an hlu zawk a ni," a ti. 

Kevin De Bruyne hian Manchester City tan season tha tak a hmang mek a, Premier League title chawi thei dinhmunah a ding mek. Kum 30 mi hian competition hrang hrang game 44 a khelhah goal 19 leh assist 13 a nei a ni. 

Kevin De Bruyne hian striker tha leh mumal zawka chawm theih tur khelhpui neih a chak hle a, season tharah hian tun hnaia striker huhang ngah ber pakhat Erling Haaland a khelhpui dawn tih a chiang tawh a, an pahniha an inkawp tur hi hmuh chak an tam tawh hlein a rinawm. Cityzen lam hian Borussia Dortmund atangin Haaland hi a release clause €75 million bawr velin an lalut dawn a ni.

May ni 11-a Wolverhampton Wanderers 5-1 a an hneh tum khan, Haaland-a lo lawmna ang reng ngeni a goal li thun zinga a goal thumnaah De Bruyne hian Haaland-a'n a pet goal tuma a celebrate thin dan angin a ti ve nghe nghe. 

Tun season-a Lionel Messi leh Cristiano Ronaldo te hnuhma i thlir lawk teh ang:

2021-22 season tan tirhin Cristiano Ronaldo leh Lionel Messi te hian team thar an zawm ve ve a, Ronaldo chu a khelh tawh thinna Manchester United lamah a lut a, Messi thung hian Barcelona atangin free transfer-in Paris Saint-Germain (PSG) a zawm bawk. 

superstar pahnihte season hman dan hi a inang lo hle a, Lionel Messi hi a insiam rem mai theih loh vangin season duhawm tak a hmang tia sawi chi chu a ni lo ang a, khel chhe tak tih tur phei chu a ni hran lo. Mahse, thian te zarah trophy a chawi. Cristiano Ronaldo thung hian trophy a chawi loh piah lamah season tharah Champions League pawh an khel phak dawn lo a, chutiang chu nimahse tun season-a Manchester United tana goal thun tam ber a ni thung. 

Lionel Messi ian competition hrang hrang game 33 a khelhah PSG tan goal 11 a thun bakah assist 13 a nei a, Ligue 1 title an chawi theihna tur goal kha box pawn lam atanga a goal thun a ni nghe nghe. 

Cristiano Ronaldo thung hian Manchester United tan game 38 a khelhah goal 24 thunin assist 3 a nei a, hetichung hian title pakhat mah an chawi lo piah lamah Red Devils hian season tharah Champions League an khel phak dawn lo a ni.