Kevin de Bruyne goal tha bik hmangin Manchester City chuan Champions League semi-final inkhel thawh khatnaah Real Madrid chu an mualah an hnehtawk a, nomawi pathum lak an beiseina a la sang zel.

City hian karleh Nilainiah an mualah Madrid an hneh chuan a vawi hnih nan Champions League final lutin Inter Milan leh AC Milan inkhela a chak zawk zawk an hmachhawn thei dawn.

Pep Guardiola team hian Bernabeu-a inkhelah hian a tir lam an thunun hle a, Thibaut Courtois chuan de Bruyne, Rodri leh Erling Haaland-a pet vawi hnih a dang a nghal.

Mahse, Vinicius Jr a lo lang a, chawlhlawk hmaa Real-in hun tha an neih awm chhun hmang tangkaiin minute 36-ah pen 25 vel zeta hla atangin Ederson a pet khum a, he goal luh hmaa Eduardo Camavinga ball ken luh chu sawi hmaih chi a ni lo bawk.

Second half-ah Real-in inkhel an thunun ve tathung a; mahse, City hian Vinicius-a petna ang vel bawka hla atangin minute 67-ah de Bruyne chuan a thlawh lut.

Aurelien Tchouameni-a’n Real hi hma a hruaipui leh teuh hle a, a vawi 15 nana European lallukhum khum tum tan hla tak atang bawka a pet chu Ederson-a’n tha takin a lo dansak thung.

City hi inkhel vawi 21 zet tlawm an nei ta lo va, heng zinga 17 phei chu an chak a. Vawi sarih an chak leh a nih chuan Treble champion an ni thei ang.

City-in an hnaih hret hret
City hi Europe-a team tha ber pawl ni zinga Champions League nomawi la la lo an ni.

An tum tihlawhtling tur chuan Etihad Stadium-ah La Liga-a pathumna ni mek, Real an hneh phawt a tul hmasa a. Chumi hnuah Serie A-a palina emaw, pangana emaw chu Istanbul-a final-ah an hmachhawn zui ang.

Guardiola team hian Premier League-ah vawi li khelh la neiin Arsenal lakah hma an hruai a, FA Cup final-ah Manchester United an la hmachhawn dawn a, June thlaa final khel tura an luha an champion chuan English team zinga Treble champion ni thei pahnihna an ni dawn.

Inkhelh hma khan phuba pawh sawi rik a tam a, season hmasa khan Real hian semifinal thovah 6-5 in vawi hnih khelhah an lo hneh tawh a nih kha.

Kum a vei a, City hi an puitling sawt a, hneh rual loh team ang deuhthawin an indin a. Thawhlehni zana inkhel erawh chuan season hmasaa inkhel thawh khatnaa 4-3 ang zet goal luh chu a hla deuh.

Guardiola hian a khelhtir thin dan ang bawka khelhtirin ball pawh an chang tam a, inkhel an thunun a, tan atanga minute 16 lek chhungin Courtois-a’n vawi li lai save a neih a ngaih phah.

Mahse, Vinicius a lo lang a, nikuma City laka lo thun tawh Brazilian hian mual neitu hma a hruaipui.

Goal phur mah se City an hnual lo va, thla thum zet hnehtu tawng lo team hian de Bruyne hmangin an hnehtawk ta a ni.

de Bruyne hian kum 2020 khan Real lakah a lo thun tawh a, Champions League chanchina knockout stage china Real khelmuala inkhel vawi khat aia tama goal thun thei hmasa ber a ni.

City hian substitution pawh an siam lo va, Belgian midfielde thun bak hi goal dang thun belhna remchang pawh an nei zui lo. Karlehah chuan goal 51 thun tawh Haaland-a lansarh a ngai tawh ang.

La dah hniam thiang lo Real
Madrid hi Champions League-a an theihna bik kan hria a, vawi 14 zet lo champion tawh an ni.

La Liga-ah chuan pathumna niin point 14 zetin Barcelona an phak lo mek a, an chungah Atletico Madrid an la awm bawk.

Mahse, kum kua liam ta chhungin Champions League-ah vawi nga an champion thei a, heng zinga pahnih phei chu La Liga-ah pathumna chauh an ni.

Carlo Ancelotti-a team hi tual chhunga chanchin dunawm nei chunga khelmual lut an ni a, Inrinni zan khan Osasuna lakah Copa del Rey final-ah hnehna an chang.

Hei mai a ni lo, Real hi English club laka sulhnu nei tha an ni. Tun hi knockout round-a a zawna City, Chelsea leh Liverpool te zinga mi an hmachhawn vawi rukna a ni a, a hmasa pangaah hian chak zawk vek an ni.

Chawlhlawk hmain bet zawk ni mah se Vinicius-a hmangin an nawr hmasak berah goal an thun a. Haaland (goal 12 leh siam vawi khat) nen tun season-a Champions League-a goal thawk chhuak hnem ber (goal sarih leh siam vawi nga) an ni ta.

Second half-ah de Bruyne goal an chhuah zui a, he goal luh hma hian a out nia a lan avangin Madrid boss Ancelotti a thinrim a, yellow card a hmuh phah hial a. Hun tawp dawnah Benzema-a a chuan tha zeta tauhvin Ederson-a’n a dansak hram a, thlak a nih hmain Tchouameni-a pet chu a lut teuh hle bawk.

Final luh beisei City
Etihad-ah an la inkhel leh dawn a, Jack Grealish chuan final an luh ngei a rin thu a sawi.

England midfielder chuan BT Sport hnenah, “Kuminah hian team thar kan nei a, player dangte nen Nikum ai khan thil tam tak kan zir belh tawh a, tawnhriat nei tha leh world class naupang zawk team-ah kan inbuk tawk,” a ti.

“Etihad-ah chuan dan theih loh niin kan inngai a. He hmunah hian chak tumin kan lo kal a, goal kan chhuah hnuah pawh kan nihna dik tak kan lantir thei a, hetiang hmunah hi chuan khelh a harsa em em reng a ni,” a ti.

An result chu a fair tawk a tih thu a sawi a. “Chance an nei tam a, keini pawhin anni aia tlem deuh kan nei ve bawk,” a ti.

City manager Guardiola chuan goal an chhuah hnua thun ve thei a naute a fak a. “Inhnehtawk tak kan ni a, he team (Real) hi an chanchin leh an thiamna avangin khelh an harsa a, ka team ka lawmpui a ni,” a ti.

“Bul kan tan tha a, goal an rawn thun a. An that zawk laiin kan thun veleh a. Manchester-ah chuan engkim inawngin final ang a ni dawn a, chu chu kan thlir e,” a ti.

Ancelotti a lawm lo
Goal an chhuahna kha ennawnin de Bruyne thun hmain ball kha a out ngei niin a lang a, Ancelotti a lawm lo hle.

“Ball kha khelmual atangin a chhuak ngei. Technology pawhin a lantir a, engvangin nge VAR-a en a nih loh ka hre thiam lo. Referee khan zanin khan thil tam tak kha ngaihsak loh a nei a ni,” a ti.

An goal chhuah danah lawm lo mah se Italian coach hi a team khelh danah a lawm thung a. “Karlehah pawh khatianga kan khelh a ngai. Kan tum a dik a, ball an chan tam kha kan ngaih pawimawh a ni lem lo,” a ti.

“Second half-ah a dang hlawk a, ball kan chang a, remchang kan siam a, kan tum angin kan awm,” a ti.