Old Trafford-a kum 12 a awm tawh chhungin David de Gea hian vawi tam tak Manchester United a lo chhanhim tawh thin a; mahse, Pathianni zanah erawh London Stadium-ah chesuala goal chhuahin West Ham United lakah si khat faiin an tlawm haw.

Spanish goalkeeper-in ho taka goal a chhuah hi Champions League khelh phak tuma an elpui ni mekte tan duhthusam a ni ang a, Hammers tan phei chuan Premier League-a awm zui tuma an beihnaah point thum hlu tak hmuhtirtu leh dinhmun hima awmtirtu a ni a tih theih.

de Gea hian minute 27-ah Said Benrahma pet a chhuah a. West Ham winger hi a pet hmain United player pathumin a bul lawkah an hual a, a thiante pek tur hnaivai pawh an awm lo, hla tak atanga goal-a a pet chu Spaniard ke chheh a lo fuh lo deuh va, awlsam taka dan theih tur chu a chhuah.

Spanish keeper de Gea hian tun season-ah tihsual ho tak tak avangin goal li a chhuah tawh a, Tottenham keeper Hugo Lloris nen tihsual vanga goal chhuah tam ber an ni mek.

Benrahma goal bak hi goal dang a awm zui lo va, United an tlawm a, David Moyes-a team erawh tlahniam thei dinhmun pathum zinga a sang ber aiin point sariha san phahin 15-naah an awm a, an hnuaia mite aiin goal difference an neih that fal bawk avangin ‘an him’ tia sawi theih thawthang an nih phah.

United hi pathumnaa kaia Champions League khel phak tura insawhnghehna hun remchang nei an ni a. An inkhelh hma chiah hian Newcastle United-in St James Park-ah Arsenal an hneh lo va, Old Trafford club hian point thum hawn sela chuan lehpelin pathumnaa chho thei an ni.

Hemi piah lamah an point hmuh loh hi panganaa awm, Liverpool tan kawng hawnsaktu a ni thei a. Reds hian khelh khata khel tam chungin point khat chiahin an phak lo mek tawh.

United hnuaia awm dang, Liverpool leh Tottenham te chuan Inrinni zan khan an tumpui an lo hneh ve ve tawh a, Brighton-in Thawhtanni zanah an khel ve dawn a, anni hi Red Devils aia khelh hniha la khel tlem zawk an ni a. Erik ten Hag-a team tan hian khelh li an la bakah palinaa tel turin kawng a la hautak hle a ni.