David de Gea hian vawi tam tak a team a chhanhim tawh thin a; mahse, amah vanga chak loh leh ho tak taka goal chhuah an nei ve fo bawk.

‘Mi bawnghnute tuk tin in thin sawi lova tlai khat a zu in’ sawi nuam ti zawk thin mihring kan nih miau avangin Spanish goalkeeper pawh hian tihthat ngah zawk mah se a tihsual leh zeuh thin a langsar a, upat lam a lo pan ve hret hret zel bawk nen, Manchester United chuan season thara a elpui tur an dap nia sawi a ni.

Contract thar ziahpui an tum, de Gea-a hi kartawpa West Ham United an hneh loh tuma goal a chhuah dan khan sawi a hlawh hle a, tun season-ah a tihsual vang liau liauvin goal li a chhuah tawh a, Premier League keeper zingah Hugo Lloris nen tihsual vanga goal chhuah hnem ber an ni mek.

A tihthat lam sawisak a ni tam lo va, sawisak ve dawn chuan tun season-a Premier League-a goal chhuah lo tam ber niin inkhel vawi 15 zet goal a hum tawh a. A hnuaiah hian Liverpool Brazilian keeper Alisson awmin vawi 13 a chhuah lo va, World champion Argentine keeper Emi Martinez-a phei chuan a phak lo hle a, vawi 11 chhuah loh a nei.

A chet thatna aia chet chhiatna a lansarh tho avangin Old Trafford club hian nakin zel thlir tel chungin a thachhang dawl tur leh a elpui tur keeper an dap mek zingah hmun danga mi sawi tam tak awm mah se anmahni zinga mi ngei pawh sawi rik a ni a, chu chu Czech Republic tlangval, an ram lama loan-a an khelhtir, Matej Kovar-a a ni.

Kum 22 mi chauh, Kovar-a hi United tan first-team-ah a la khel phak ngai lo va; mahse, season lehah chuan Europe-a keeper naupang tha pawl ni mek hi telhtir an tum nia sawi a ni.

Kovar-a hian kum 2018 khan FC Slovacko atangin United a zawm a, tunah pawh an player a la ni a; mahse, first team tan a la inlan lo va, Ole Gunnar Solskjaer-a enkawlna hnuaiah erawh kha chuan Champions League squad-ah a tel ve thung.

First-team football erawh a lo tem fo tawh thung a, a neitute hian inzir nan Swindon leh Burton-ah an lo chhuahtir tawh a, tunah hian an ramah Sparta Prague tan a khel mek.

An ramah hian a che chhe lem lo va, Czech First League-ah pakhatna dinhmun a luahpui mek a, kum kua zet hnua a vawi khat nan nomawi a lakpui theih hmel hle.

United-a goalkeeping staff-te pawhin Kovar-a hi season tharah koh hawa de Gea nena Old Trafford-ah inel turin an duh nia sawi a ni.

Swiss veteran Yann Sommer-a pawh England-a lak luh sawi rik a awm a, ani hi nipuia Bayern Munich chhuahsan tur a ni a. Anderlecht Dutch keeper naupang thangduang tak, Bart Verbruggen pawh an sawi ri bawk.

Porto atangin Diogo Costa leh Brentford keeper David Raya te pawh United it zingah an tel.

Tunah hian de Gea thachhangdawltu zinga mi, Jack Butland chu a chhuah hmel a, Scottish giants Glascow Rangers a pan hmel a. Tom Heaton erawh nipuia a contract zo tur ni mah se season khat dang an la kawl zui hmel.