Best goalkeeper hial ni mah se David de Gea chu season tharah Manchester United No. 1 a ni reng dawn em tih a chiang lo va. Khawvela man to ber ni mah se Harry Maguire pawh season liam taa a dinhmun thlirin a nghet thei ta tlat lo.

Manager Erik ten Hag chuan Maguire-a hi season lehah United player a ni dawn em tih a sawi chiang ngam lo va, Spanish keeper erawh a la kawl dawn tih a sawi chiang.

De Gea-a hi season liam taah Ajax boss hlui No. 1 niin Premier League-ah goal chhuah lo tam ber a nih avangin Golden Glove hial a dawng.

Mahse, Dutch manager chuan kum 32 mi hi season tharah chuan a No. 1 reng lo thei tih a sawi a, “United ang club-ah chuan khawi postition-ah pawh inelna a awm reng tur a ni a, No. 1 a ni leh dawn tih ka sawi thei lo,” a ti a. Elpui tur neiin khelh an inchuh dawn a nih hmel hle.

England defender rinrawl, Maguire-a ve thung hi season liam taah vawi 16 chauh United tan a inlan phak a, a inlan chhunah lah tihsual neiin an chak loh phah fo tih chu khawvelin a hria.

Ten Hag chuan kum 2019-a Leicester City atanga £ maktaduai 80 zet senga khawvela defender man to ber ni tura an lak luh dinhmun hi a nghet lo tih a nemnghet.

“A tan a harsa a, theihtawp chhuahin zaah za a inpe a, a training tha bawk a. Centre-back-ah elpui tur Raphael Varane a nei a, ani a khel tha si. Kan kianga a awm hi ka lawm a, kan mamawh hunah a tih tur a ti thin a; mahse, thutlukna siam ngaiin a awm mek,” tiin a sawi.

Maguire-a hi England chuan an ringtawk viau zel a, 2022 World Cup-ah pawh vawi nga an khelhah a inlan kim vek a, Euro qualifiers an hmabakah pawh manager Gareth Southgate chuan ko leh a; mahse, club-a a khelh tam loh chuan ram tana inlan reng a harsat tur thu a sawi tel.