Premier League-a a zawna Manchester City vawi thum champion thei coach meuh pawhin, “Tun kum 20 chhunga coach huhang ngah ber pakhat,” tia a sawi, Roberto di Zerbi hi Brighton a enkawl hma hian tu khaw kha hriat a nih a rinawm loh.

A tun hma nun en ila, a khelh laiin insawi theihna tur tawk velin AC Milan leh Napoli kawrte lo ha ve tawh bawk mah se hriat hlawh a ni ngai lo va, team tenau zawka tirh chhuah reng rengin hun a hmang a ni ber a. Club a enkawl tawhte zingah lah Europe-a tlar hmaa thu pha tur team an awm meuh lo.

Mahse, tunah chuan 2022-23 Barclays Premier League Manager of the Season dawng tura chhawpchhuah paruk zingah a tel a, a tel mai a ni lo, mi tam tak chuan City champion-puitu, Pep Guardiola aia dawng âwm ni hialin an ngai.

Ni e, Italian manager-in kum khat pawh la liam lova England a thlen hnua a thil tih hi a ropui a, football khawvelah chanchin ngaihnawm ber pakhat a ni mek.

Guardiola chuan, “An khelh dan anga khel ve reng reng hi an awm lo - a danglam a ni,” tiin Brighton a khelhtir thin dan a fak a. “A lo thlen hlim khan Premier League-ah a ropui ang tih ka ring sa a; mahse, heti taka hun rei lo chhunga a ropui theih erawh ka beisei phak loh a ni,” a ti.

“Inkhelh apiangin chance vawi 20/25 a siam thei a, an tumpuite aia tam fe zel a ni a. Tuna an hlawhtlinna hi an phu tak zet,” tiin an club chanchina a vawi khat nana Europe-a an inlan tur chungchang a sawi bawk.

Chelsea-in Graham Potter an lak takah khan Brighton hian a thlaktu turin hna nei lo, De Zerbi hi an la lut a. Hemi hma hian Ukrainian club hlun, Shakhtar Donetsk enkawlin a chet thatpui lai takin Russia-in Kyiv a rûn avangin an inkhel zui thei lo va, ani pawhin a chhuahsan.

Ukraine-a hun a hman hma hian Italian club lian lem lo tak tak - Palermo, Benevento leh Sassuolo te a lo enkawl tawh a. Hengah hian chanchin ropui a nei lo.

Kum 2016-a Palermo a enkawl laiin vawi sarih zet chak lo zawnin an mualah thla thum zet point a hmuhpui lo va, bân a ni.

Kum 2017-ah Serie A kai thar, Benevento a enkawl leh a, Serie B-ah a tlakpui lehnghal a; mahse, ball an chan ngheh danah te, attacking football a khelhtir dan leh player a lei leh hralh danah erawh fak a hlawh thung.

June, 2018 atangin Sassuolo a enkawl leh a, kum 2021 thleng enkawlin season hnih a zawnin Serie A-ah pariatnaah awmpuiin goal difference-a an hniam vang chauhvin Europe-ah a inlanpui pha lo.

May, 2021-a a chhuah hnuah Ukrainian Premier League club a pan nghal a. September thlaah Ukrainian Super Cup a lakpui a, Italian manager zinga la hmasa ber a ni a; mahse, a kum leh tir maiah Vladimir Putin-a hoten Ukraine an rûn tak avangin UPL khelh zui theih a ni ta lo va, ani pawh a chhuak zui ta a ni.

September 18, 2022-ah Seagulls chuan tu hriat hlawh tak ni lo chu Potter-a thlaktu atan kum li daih contract an ziahpui a, tunah chuan Italian coach an la an inchhir loh dan tur chu kan hriat thiampui âwm e.

De Zerbi hian kum 1901 daih tawha din, Brighton chu a vawi khat nan khawmualpui huap inelnaah a inlanpui dawn a, tuna an dinhmun enin Europe Conference League tal an khel dawn a, khelh hnih an la neiha an result azirin a aia sang, Europe League pawh an la beisei ngam a ni.