Aizawl: Ministry of Home Affairs thuchhuak chuan Death Certificate la tur te'n an lakna mitthi Aadhaar an keng tel tur a ni tiin a lo chhuah a, nimahsela sawiselna hrang hrang avangin Ministry chuan ngai ngei ngei tura an thuchhuah chu an sut leh a, an siam rem leh niin Economics & Statistics Department (E&SD) hotute chuan Zalen an hrilh. Thudawn danin Ministry thuchhuah hmasaah hian October 1 atangin State pathum Jammu & Kashmir, Meghalaya leh Assam tih lohah chuan death certificate la tu turin a mitthi Aadhaar an keng tel ngei tur a ni tih a ni a. Nimahsela he thuchhuah hi sawiseltu an tam avangin Ministry lam chuan an rawn siamtha niin E&SD hotute chuan an sawi. Thuchhuah siamthatna ah hian death certificate la tu tur te chuan mitthi in Aadhaar a neih loh emaw ken tur an neih loh chuan declaration an thehlut tur a ni tih a ni a. A diltute erawh chuan anmahni Aadhaar leh a mitthi nupui emaw pasal emaw a chhungte Aadhaar an keng ngei tur a ni tiin siamthat a ni a. Hemi awmzia chu Aadhaar ngai ngei ngei tura Ministry lamin an rawn chhuah chu Aadhaar ken tel tur an neih loh chuan ngaihhnathiamna a awm thei ta niin E&SD hotute chuan an sawi a ni.