Aizawl: Reserve Bank of India (RBI) chuan pawisa fai a thil lei tihtlem nan leh debit leh credit card hmanga sum chevel tih tam nan sumdawng ten heng card-te an hmanna man bank hnena an pek tur Merchant Discount Rate (MDR) chu a tihniam. RBI thawktute hnen atanga thudawn danin a hma chuan card hrang hrang hmanga sum chet veltirna man bank-in sumdawngte hnena a lak chu an pawisa chevel atanga chhut a ni a, card hmanga sum an lakluh emaw pekchhuah tam leh tam loh atangin MDR an chawi tur zat chu teh thin a ni. Tuna dan siamtharah erawh chuan sumdawngte kum hmasa chhunga an sum chevel atanga chhut a ni tawh thung dawn a ni. Debit card hmangtute bikah chuan kum hmasaa sum chevel Rs. nuai 20 hnuai lam nei sumdawngte chuan an card hmanga customer te'n an hnena thil an leina pawisa zawng zawng belh khawma zaa 0.40 (0.40%) chu bank hnenah an chhunglut tur a ni tih RBI chuan a tarlang a, “Hemi awmzia chu miin debit card hmangin Rs. 20,000 man thil lei se, heta zaa 0.40 chu Rs. 80 a ni a, hei hi sumdawngtu te'n bank hnenah card hmanga pawisa an chetvel tirna man an chhunluh tur a ni,” tiin RBI hotute chuan Zalen an hrilh. “Nimahsela, hei hian Rs. 200 a pel tur a ni lo a, Rs. 250 te a lo nih chuan a tam ber tura ruahman Rs. 200 hi an pe tur a ni,” tiin an sawi bawk. Rs. nuai 20 aia tam sum chevel neitu sumdawng te erawh chuan zaa 0.90 a pe ve thung anga, Rs. 1000 a pel tur a ni lo bawk. Hetah hian QR code scan hmanga miin thil an lei anih erawh chuan sumdawng ten bank hnena an chhunluh tur hi a tlem leh hret a. Rs. Nuai 20 hnuailam sum chevel kum hmasaa nei sumdawngte tan 0.30% a ni ve thung ang a, Rs. Nuai 20 aia tam tan 0.80% a ni bawk ang. RBI chuan thupek khauh tak siamin sumdawngten pawisa an chawi tur hi customer ah an thing tur a ni lo niin an sawi a. “Miin cheng 20000 man debit card hmangin thil a lei a, 0.40% lak a nih chuan aman chu Rs. 20,080 ang a lo ni ta a, customer chuan a thil lei man Rs. 20,000 tho an pe tur a ni a, Rs. 80 chu card hman man sumdawngte zawkin bank hnena an chawi tur a ni,” tiin an sawi bawk. Sumdawnna awlsam leh ngelnghet zawka kalpui a nih theih nan leh hemi a thlen nana sum fai ni lo, card hrang hrang leh QR based scan (digital payment) hman uar a nih theih nan RBI chuan he ruahmanna thar hi a siam niin an sawi a ni.&&&&&