ZALEN August 2, 2023 : National Health Mission hnuaia State Immunization Office te chuan vawiin khan Aizawl Press Club-ah MJA te tan 'Mizoram Media Sensitization Workshop on IMI 5.0' an buatsaih-a he hunah hian Invenna lak (Immunization) a pawimawhna zirho a ni a, December 2023 hma hian Sentut umbo hman tum a ni.

He hunah hian 'Intensified Mission Indranush (IMI) 5.0' chungchang te, 'Measles Rubella Elimination in Mizoram' tih leh 'Laveraging Learning of Covid 19 vaccination' tih thupui hmangin inhrilh hriatna neih a ni.

IMI 5.0 ruahmanna ang chuan December 2023-ah hi chuan Sentut (Measles) leh Sentet (Rubella) te chu Mizoram mai ni lo India ram atanga umbo tum a ni a, tunah hian state tin te chu MR dose (MR1, MR2) te 95% tal pe turin tih an ni. Heng vaccine te hian natna hi a veng tak tak em tih zawhna awm chungchangah vaccine lak hian 95% chu a veng an ti a, vei te chu awmtho mah se, vaccine hian heng hri te avanga natna dang vei theih te lakah a him thu an sawi a ni.

Naupang te chu an pianhlim atanga kum 5 an nih thleng vaccine tum 7 lak a ngai tih an sawi a, Vaccine an lak te hian natna chi 11 laka invenna a ni an ti a, India ram hmun dangah chuan natna chi 12 laka invenna vaccine pek thin a nih thu an sawi a, mahse Mizoram-ah chuan Japanese encephalitis hmuh a la nih loh avangin pek ngaiah ruat a nih loh thu an sawi.