Mizo Wrestling Association (MWA) leh LPS Vision Production chuan December 9-11, 2024 chhung hian lawmman pawisa fai Rs. 6,10,000 zet an sem ralna tur Mizo Inchai Title Fight a buatsaih dawn a, title fight paruk a awm ang.

Champion Sangliana hmaah kg 10-a rih belh tum Rinchhana

LPS Arena-a Title Fight paruk awm tura ngaihven hlawh ber ni lo thei lo chu Palian a ni a. Hetah hian kum 10 zet champion kawnghren lo hreng zawn tawh, Lalsangliana hmaah tun hnaia amah chotu tur zawn chhuah, Lalrinchhana Sailo a ding dawn.

North Vanlaiphai pa chak, kum 29 mi, Rinchhana hi tun hnaia LPS Arena thova champion lai cho tur zawnnaah inlan pathum zingah dingchang berin Sangliana hmaa a ding dawn a ni.

Sangliana chotu tur zawn laia kg 97-a rit, Rinchhana hian December thlaa an inbeih tak tak hunah chuan kg 10 laia rih belh hman tumin a bei mek tih MWA hruaitute hnenah a sawi tawh.

Champion lai, Rinchhana nena inchen chiah, Sangliana hi kg 118 zeta rit a ni a. Tuna a lan danah chuan an rihna hi kg 21 zetin a inthlau va, kg 10 a belh leh theih erawh chuan intum tawk tak ni tura beisei a ni.

Upper Republic tlangval, Sangliana hi kum 2014-a champion kawnghren a hren tan hnuah amah chotu apiang tudawl zel thei a ni a, tawnhriat a ngah tawh.

A hmaa ding tur thung erawh Mizo inchaiah tawnhriat a la nei tam lo va, SAI, Aizawla lo inzir tawh erawh niin Mizo infiamna, Insaihruipawha champion ni lai a ni thung.

MWA hruaitute chuan Rinchhana hi mite titi-ah Sangliana lakah chuan la nem deuh zawk tura ngaihna awm mah se intumtawk tak tur an nih an beisei tih an sawi a, “Inchai chhungkua an nia, Vanlalkulha thlah kal zela mi a la ni bawk,” an ti.

Title Fight dang

Palaihawlah champion lai, Remruatpuia hmaah Ngursangzuala a ding dawn a. An pahnih hian kg 79 ve vea rit niin san zawng erawh champion lai hi a sang hret.

Saitual khawchhuak ve ve niin Remruatpuia erawh Bethlehem Vengthlang, Aizawlah a inbengbel tawh thung.

Pate-ah Lalchhanhima’n kawnghren hreng mek, B.Lalawmpuia a hmachhawn dawn. 

Saitual tlangval, Chhanhima hi 39 Assam Rifles-a awm mek niin kum 2014 leh 2022 inkarah Pate huanga vawk lallen, kawnghren lo hreng ngar ngar tawh a ni a. Tun tumah hian a kawnghren hren thin tawh chuh thar leh a tum a, Pro Wrestling Pate Title kawl lai nen an inhmachhawn ang.

Nulianah title kawl lai, Lalhmangaihsangi hmaah amah chotu, Zodinpuii a ding dawn a. Ramthar, Lunglei nula, Zodini hi inchaia hnuhma la nei ngai lo a ni a, Hmangaihi erawh kum 2022-a Nulian Title a lak hma atang tawhin wrestling-ah medal a lo la nual tawh.

Hei bakah hian Dilkhan nula, Salem Veng, Aizawla cheng mek hian kum 2023-a Zonet TV leh Mizoram Powerlifting Association buatsaihah khan ‘Mizorama nu chak ber’ nihna a lo la tawh bawk.

Nulaihawlah Penticost Lawmsangpuii Varte-in champion lai, Elizabeth Rohlupuii a cho thung a. An pahnih hian North East Games 2024-a Mizoram tana wrestling-a gold medal la phak ve ve an ni.

Nute-ah kawnghren kawl mektu, Lalvenhimi hmaah Lalnuntluangi a ding dawn a. Feet 5’3 ve vea sang an pahnih hian an rit zawngah pawh an intluk tawk hle a, wrestling-a hnuhma lo nei nual tawh ve ve an ni bawk.

Lawmmanah nuai ruk chuang

MWA chuan Ningania Aizawl Press Club-a thuthar lakhawmtute an kawmnaah title fight an buatsaih turah hian lawmman pawisa fai Rs. 6,10,000 zet an sem ral dawn tih an sawi.

Title ngaihhlut leh ngaihven ber, Palian champion hnenah Rs, 1,00,000 pein a chak lo zawk hnenah Rs. 50,000 an pe dawn.

Title fight dang pangaa inlan turte hi champion hnenah Rs. 50,000 zel leh chak lo zawk hnenah Rs. 30,000 zel an pe ang.

Zan thum chhung title fight awm turah hian exhibition match paruk a awm dawn bawk a, hetah inlante hian Rs. 5,000 theuh an hlawh dawn bawk.

Kumin title fight-ah hian champion hnenah kawnghret thar vek an pe dawn bawk a. Tuna an hman mek chu tuna a kawltuten an nei hlen thei ang a, a thar hi champion thar hnenah an hlan dawn a. Kawnghren thar hi Samoo, Dawrpuiin tumsak a ni a. Thuthar lakhawmtute hmaah hian an tlangzarh nghal nghe nghe.