ZALEN May 31, 2026: Union Power Minister Manohar Lal chuan Mizorama lui pathum - Tlawng, Tuivai leh Chhimtuipuia Hydro Electric Power plant siam tura ruahmanna kalpui dan tur chu P&E Minister F. Rodingliana nen Delhi-ah an sawiho dawn tih a sawi.

Zirtawpni khan MINECO Conference Hall-ah Ministry of Power leh Ministry of Housing & Urban Affairs changtu, Union Minister Lal kaihhruaiin State Review Meeting of Power & Housing & Urban Affairs, Mizoram neih a ni a. He meeting-ah hian UD&PA Minister K.Sapdanga, P&E Minister F.Rodingliana leh sawrkar mi pawimawhte an tel.

Union minister chuan kawphetha hman man khawn chungchanga harsatna awmte chu zir chianga kim taka khawn chhuah a nih theih nan a tul anga hma la turin Power & Electricity Department-a thawktute chu a chah.

Smart meter vuah kawngah sawrkar building leh sumdawnna hmun lian atanga kalpui tan a pawimawh thu leh kawphetha hman man tha taka khawn chhuah a nih theih nan pre-paid kalpuinaah ‘Security deposit’ kalpui tel a pawimawh thu a sawi a. Ni zung hmanga kawphetha siam chhuah chu uar deuh deuh turin a chah bawk.

Lal chuan press mite a kawmnaah Swacch Bharat Mission (SBM) kum 10 kalpui a nih tawh thu leh chumi chhung chuan Mizoram chuan Open Defecation Free mai piah lamah ODF+ dinhmun a luah mek thu tar langin, bawlhhlawh sawngbawl kawnga sawt zawka hmalakna kalpui dan turte sawiho a nih thu a sawi a. Khawpui vawn fai, bawlhhlawh thliar hran leh faina leh thianghlimna kawnga hmasawnna a thlen zel theih nan sawrkar laipui atangin puih an inhuam reng thu a sawi bawk.

Review meeting-ah hian Mizoram chhunga smart meter vuah tura bituk zat 2,92,081 zinga 52,886 vuah tawh niin, 18.01% hna thawh zawh a nih thu te, prepaid meter conversion programme bul tan nan P&E Department office atanga hmalak a nih thu te tar lan a ni a. Standard Operating Procedure (SOP) pawh tihfel tep a ni tawh thu leh hemi hnu hian prepaid hmang hmasa apiang tan 2% rebate pek tel a nih tur thu tar lan a ni bawk.